ប្រព័ន្ធផ្សព្វផ្សាយរុស្ស៊ី នៅថ្ងៃព្រហស្បតិ៍ (ទី២៣ ខែឧសភា)នេះ បានរាយការណ៍ថា ប្រទេសរុស្ស៊ីបានឃុំខ្លួនអនុប្រធានអគ្គសេនាធិការរបស់កងទ័ព លោកឧត្តមសេនីយ៍ឯក Vadim Shamarin ពីបទសង្ស័យថា បានទទួលសំណូកក្នុងចំនួនដ៏ច្រើន ដែលនេះជាករណីចុងក្រោយបង្អស់នៃការចាប់ខ្លួនជាបន្តបន្ទាប់លើមន្ត្រីយោធា។

សារព័ត៌មាន Kommersant បានរាយការណ៍ថា លោក Shamarin ត្រូវបានឃុំខ្លួន ពាក់ព័ន្ធនឹងការក្លែងបន្លំ ហើយថា គេហដ្ឋានរបស់លោកត្រូវបានឆែកឆេរ។ នេះគឺជាការចាប់ខ្លួនលើកទី៤ ចំពោះឥស្សរជនការពារជាតិជាន់ខ្ពស់ គិតចាប់តាំងពីខែមេសា នៅពេលដែលអនុរដ្ឋមន្ត្រីការពារជាតិ លោក Timur Ivanov ត្រូវបានឃុំខ្លួនបណ្តោះអាសន្នពីបទសង្ស័យទទួលសំណូក។

ចាប់តាំងពីពេលនោះមក ឧត្តមសេនីយ៍ឯក លោក Yuri Kuznetsov ប្រធានបុគ្គលិកនៃក្រសួងការពារជាតិ និងឧត្តមសេនីយ៍ទោ លោក Ivan Popov អតីតមេបញ្ជាការកងទ័ពទី៥៨ របស់រុស្ស៊ី ត្រូវបានចាប់ខ្លួនផងដែរ។

គួរបញ្ជាក់ថា ការចាប់ខ្លួនជាបន្តបន្ទាប់នេះ កើតឡើងចំពេលមានការផ្លាស់ប្តូរដ៏សំខាន់ នៅក្នុងវិស័យការពារជាតិរបស់រុស្ស៊ី បន្ទាប់ពីប្រធានាធិបតី លោក Vladimir Putin ក្នុងខែនេះ បានដកលោក Sergei Shoigu ចេញពីតំណែងជារដ្ឋមន្ត្រី ដោយជំនួសមមកវិញដោយអតីតឧបនាយករដ្ឋមន្ត្រីលោក Andrei Belousov៕