លោក Donald Trump បានបង្ហោះនៅលើបណ្ដាញសង្គមថា លោកនឹងប្រើប្រាស់ទំនាក់ទំនងរបស់លោកជាមួយប្រធានាធិបតីរុស្ស៊ី លោក Vladimir Putin ដើម្បីឲ្យអ្នកសារព័ត៌មាន Wall Street Journal (WSJ) លោក Evan Gershkovich រួចខ្លួនពីការជាប់ពន្ធនាគារ នៅរុស្សី។

លោក Trump បានសរសេរនៅលើវេទិកាបណ្ដាញសង្គម Truth Social ថា រឿងនេះនឹងកើតឡើង នាពេលឆាប់ៗនេះ បន្ទាប់ពីការបោះឆ្នោតខែវិច្ឆិកា នៅសហរដ្ឋអាមេរិក ពោលគឺនៅពេលដែលរូបលោកកំពុងស្វែងរកជ័យជម្នះលើប្រធានាធិបតី លោក Joe Biden ហើយត្រឡប់ទៅអង្គុយកៅអីសេតវិមានវិញ។

នៅក្នុងការបង្ហោះនោះ លោក Trump បានរៀបរាប់ថា៖ «អ្នករាយការណ៍ព័ត៌មានរបស់សារព័ត៌មាន Wall Street Journal គឺលោក Evan Gershkovich ដែលកំពុងត្រូវបានឃុំខ្លួនដោយប្រទេសរុស្ស៊ី នឹងត្រូវបានដោះលែងយ៉ាងឆាប់ បន្ទាប់ពីការបោះឆ្នោត ប៉ុន្តែច្បាស់ណាស់ គឺនៅមុនពេលដែលខ្ញុំចូលកាន់តំណែង។ រូបគេនឹងបានរស់នៅក្នុងផ្ទះ មានសុវត្ថិភាព និងជួបជុំជាមួយគ្រួសាររបស់ខ្លួន»។

អតីតប្រធានាធិបតីរូបនេះ បានបញ្ជាក់បន្ថែមថា៖ «ប្រធានាធិបតីរុស្ស៊ី លោក Vladimir Putin នឹងធ្វើរឿងនោះ ដើម្បីខ្ញុំ ប៉ុន្តែមិនមែនដើម្បីនរណាផ្សេងឡើយ ហើយយើងនឹងមិនចាំបាច់ចំណាយអ្វីទាំងអស់!»។

តែយ៉ាងណាក្ដី លោក Trump មិនបានសំដៅលើទំនាក់ទំនងណាមួយជាមួយលោក Putin ឬនិយាយពីហេតុផលអ្វីដែលលោកត្រូវជឿថា មេដឹកនាំរុស្ស៊ី នឹងដោះលែងលោក Gershkovich។

សូមបញ្ជាក់ថា អ្នកសារព័ត៌មានរបស់ WSJ រូបនេះ ត្រូវបានចាប់ខ្លួន នៅរុស្ស៊ី កាលពីខែមីនាឆ្នាំមុន ពីបទចារកម្ម ជាការចោទប្រកាន់ដែលសាមីខ្លួន ស្ថាប័នរបស់គាត់ និងរដ្ឋបាល លោក Biden សុទ្ធតែបានបដិសេធយ៉ាងដាច់ណាត់។ លោកបានចំណាយពេលជាង ១ឆ្នាំហើយ ក្នុងពន្ធនាគារ នៅទីក្រុងមូស្គូ ខណៈដែលមិនទាន់មានថ្ងៃកំណត់ សម្រាប់ការកាត់ក្ដី៕