សមយុទ្ធយោធារួមគ្នា រវាងកងកម្លាំងប្រដាប់អាវុធរបស់ហ្ស៊កដានី សហរដ្ឋអាមេរិក និងប្រទេសដៃគូផ្សេងទៀត បានឈានដល់ទីបញ្ចប់ហើយ នៅថ្ងៃព្រហស្បតិ៍ (ទី២៣ ខែឧសភា) នេះ។

សមយុទ្ធដែលត្រូវបានគេស្គាល់ឈ្មោះថា «Eager Lion» បានធ្វើឡើងនៅក្នុងទីក្រុង Maan នៃប្រទេសហ្ស៊កដានី និងរួមបញ្ចូលប្រទេសចំនួន ៣៣ផ្សេងៗគ្នា។

នាយកផ្នែកព័ត៌មានយោធារបស់ហ្ស៊កដានី លោកឧត្តមសេនីយ៍ត្រី Mustafa al-Hayari បានប្រាប់សារព័ត៌មាន Reuters ថា ការហ្វឹកហ្វឺននេះ រួមមានកងកម្លាំងអាកាស និងផ្លូវគោក។

លោកវរសេនីយ៍ទោ John Hancher នៃកងកម្លាំងប្រដាប់អាវុធសហរដ្ឋអាមេរិក បាននិយាយថា ព្រឹត្តិការណ៍នេះ គឺជាឱកាសមួយ «ដើម្បីស្វែងយល់ពីរបៀបដែលប្រទេសផ្សេងទៀតដំណើរការ និងធ្វើការ និងរបៀបដែលយើងអាចស្វែងរកមូលដ្ឋានរួម ក្នុងប្រតិបត្តិការជាមួយគ្នា»។

យោងតាមគេហទំព័ររបស់បញ្ជាការកណ្តាលរបស់សហរដ្ឋអាមេរិក សមយុទ្ធ «Eager Lion 24» គឺជាសមយុទ្ធពហុភាគី «បានរៀបចំឡើង ដើម្បីផ្លាស់ប្តូរជំនាញយោធា និងធ្វើឲ្យប្រសើរឡើងនូវអន្តរប្រតិបត្តិការ ក្នុងចំណោមប្រទេសជាដៃគូ»៕