ការិយាល័យកិច្ចការកោះតៃវ៉ាន់របស់ក្រុមប្រឹក្សារដ្ឋប្រទេសចិនបាននិយាយកាលពីថ្ងៃព្រហស្បតិ៍ទី២៤ខែឧសភាសប្ដាហ៍នេះ ថា សមយុទ្ធធ្វើឡើងដោយកងទ័ពរំដោះប្រជាជនចិនជុំវិញកោះតៃវ៉ាន់ជាការដាក់ទណ្ឌកម្មយ៉ាងម៉ឺងម៉ាត់ចំពោះការញុះញង់ ធ្វើឡើងដោយមេដឹកនាំថ្មីរបស់តំបន់តៃវ៉ាន់លោក ឡៃ ឆឹង-ទ័រ(Lai Ching-te)នៅក្នុងសុន្ទរកថារបស់លោកកាលពីថ្ងៃចន្ទ ដែលសំដៅលើឯករាជ្យ។

លោក ឈិន ប៊ិន ហ័រ (Chen Binhua) អ្នកនាំពាក្យការិយាល័យនេះ បានអត្ថាធិប្បាយនៅក្នុងសន្និសីទសារព័ត៌មានមួយថា សមយុទ្ធនេះក៏ជាការព្រមានយ៉ាងម៉ឺងម៉ាត់ផងដែរប្រឆាំងនឹងកងកម្លាំងខាងក្រៅដែលគាំទ្រឲ្យកោះតៃវ៉ាន់ផ្ដាច់ខ្លួនឯករាជ្យ និងការជ្រៀតជ្រែកក្នុងកិច្ចការផ្ទៃក្នុងរបស់ប្រទេសចិន គឺជាវិធានការមួយដើម្បីការពារអធិបតេយ្យភាពជាតិ និងបូរណភាពទឹកដីរបស់ចិន។

លោក ឈិន បាននិយាយថា លោក ឡៃ បានជំទាស់យ៉ាងខ្លាំងចំពោះគោលការណ៍ចិនតែមួយ ចាប់តាំងពីចូលកាន់តំណែង ដោយបានផ្សព្វផ្សាយទ្រឹស្តី រដ្ឋពីរ និងព្យាយាមលើកមុខមាត់របស់កោះតៃវ៉ាន់ជាអន្តរជាតិ និងបន្តស្វែងរក ឯករាជ្យ ដោយពឹងផ្អែកលើបរទេស និងដោយការប្រើកម្លាំង។

លោក ឈិន បានសង្កត់ធ្ងន់ថា យើងនឹងមិនអត់ឱនចំពោះទង្វើផ្តាច់ខ្លួន ឯករាជ្យរបស់កោះតៃវ៉ាន់ ក្នុងទម្រង់ណាមួយឡើយ។

អ្នកនាំពាក្យរូបនេះបានបន្ថែមថា វិធានការតបតប្រឆាំងនឹងសកម្មភាពបំបែកខ្លួន និងការជ្រៀតជ្រែកដោយកងកម្លាំងខាងក្រៅ មិនសំដៅលើជនរួមជាតិរបស់យើងនៅតៃវ៉ាន់ទេ។

លោកបានបង្ហាញក្តីសង្ឃឹមថា ជនរួមជាតិតៃវ៉ាន់ នឹងឈរយ៉ាងរឹងមាំលើផ្នែកខាងស្តាំនៃប្រវត្តិសាស្ត្រ និងរួមគ្នាប្រឆាំងនឹងទង្វើផ្តាច់ខ្លួននៃឯករាជ្យភាពតៃវ៉ាន់ និងការជ្រៀតជ្រែករបស់កងកម្លាំងខាងក្រៅដើម្បីសម្រេចបានការជុំជាតិឡើងវិញ៕