នាព្រឹកថ្ងៃទី២៤ ខែឧសភា ឆ្នាំ២០២៤ អគ្គលេខាធិការដ្ឋានក្រុមប្រឹក្សាជាតិកម្ពុជា ដើម្បីកុមារ​សហការ​ជាមួយអង្គការសម្ព័ន្ធសិទ្ធិកុមារកម្ពុជា (CRC Cambodia) និងចលនាកុមារ និង យុវជន​កម្ពុជា​ ដើម្បី​សិទ្ធិកុមារ (CYMCR) បានរៀបចំវេទិកាកុមារ។

វេទិកានេះមានការចូលរួមពី អ្នកធ្វើគោលនយោបាយមកពីក្រសួងអប់រំ យុវជន និងកីឡា ក្រសួង​មហាផ្ទៃ ក្រសួងសុខាភិបាល ក្រសួងសង្គមកិច្ច រួមទាំងតំណាងមកពីក្រសួងប្រៃសណីយ៍។ លើស​ពី​នេះគឺវត្តមានរបស់កុមារដោយផ្ទាល់ ក៏បានចូលរួមក្នុងវេទិកានេះផងដែរ។ វេទិកានេះ ធ្វើឡើង​ក្នុង​គោលបំណងឲ្យកុមារទទួលបាននូវសិទ្ធិ ចូលរួមរបស់ពួកគេក្នុងការបង្ហាញនូវឆន្ទៈ និងក្តី​កង្វល់​អំពី​ការ​ទទួលបាននូវសិទ្ធិនានា និងលើកឡើងជាមួយអ្នក រៀបចំគោល​នយោបាយ​របស់​អ្នក​ពាក់ព័ន្ធ​សំខាន់ៗ នៃរាជរដ្ឋាភិបាលកម្ពុជា។

ចំណែក អ្នកធ្វើគោលនយោបាយមកពីបណ្តាក្រសួង ស្ថាប័នពាក់ព័ន្ធ នៅថ្ងៃនេះបានបង្ហាញ​ពី​គោល​នយោបាយ​របស់ខ្លួន ពាក់ព័ន្ធនឹងការអនុវត្តសិទ្ធិកុមារនៅកម្ពុជា ជាពិសេសនៅក្នុង​យុគ្គសម័យ​ឌីជីថល​។ ក្រោយពីទទួលបាននូវការបង្ហាញ និងឆ្លើយបំភ្លឺពីវាគ្មិនទាក់ទងនឹងសំណួរ និងក្តីកង្វល់របស់កុមាររួចមក ក្រុមកុមារ និងយុវជនទាំងនោះ​នឹងរៀប​ចំ​ជា​សេចក្តី​ថ្លែងការណ៍​របស់​ខ្លួន ដើម្បីដាក់ជូនរាជរដ្ឋាភិបាលសម្រាប់ពិចារណា និងសម្រេចចិត្ត​នៅ​ក្នុង​ខួប​អនុស្សាវរីយ៍ លើកទី៧៥ ទិវាកុមារអន្តរជាតិ ១មិថុនា ខួបទី២៣ ទិវាប្រឆាំងពលកម្មកុមារ ១២ មិថុនា និង​ទិវា​កុមារ​កម្ពុជា​ឆ្នាំ២០២៤ ខាងមុខនេះ។

ក្នុងឱកាសចូលរួម ក្នុងវេទិកានេះ ឯកឧត្តម ណាត ប៊ុនរឿន រដ្ឋលេខាធិកាក្រសួងអប់រំ យុវជន និង​កីឡា បានលើកឡើងថា ក្រសួងអប់រំ តែងចាត់ទុកថាកុមារ ជាសសរទ្រូង និងជាអ្នកបន្តវេន។ ជារៀងរាល់ឆ្នាំ ក្រសួងអប់រំ តែងធ្វើយុទ្ធនាការប្រមូលកុមារគ្រប់អាយុឱ្យចូលសិក្សាគ្រប់គ្នា ស្រប​តាម​ពាក្យ​ស្លោក «ការអប់រំសម្រាប់ទាំងអស់គ្នា ទាំងអស់គ្នាសម្រាប់ការអប់រំ»។ លើសពីនេះ​ក្រសួង​មាន​កម្មវិធីផ្ដល់អាហារូបត្ថម្ភតាមសាលារៀនពិសេសនៅតាមសាលាជនបទផងដែរ។

ក្នុងវេទិកា​នេះលោកជំទាវ សន សោបោន អនុរដ្ឋលេខាធិការក្រសួងសង្គមកិច្ច បានលើក​ឡើង​ដែរ​ថា ក្រសួងសង្គមកិច្ច ក៏កំពុងរៀបចំសេចក្ដីព្រាងច្បាប់ស្ដីពី កិច្ចការពារ​កុមារ​នៃ​ព្រះរាជាណា​ចក្រ​កម្ពុជា​ក្នុង​គោលបំណងការពារ លើកកម្ពស់សុខុមាលភាពកុមារ ផ្ដល់អំណាចក្នុង​ការ​ចូលរួម​របស់​កុមារ ព្រមទាំងរក្សាឧត្តមប្រយោជន៍កុមារ៕ អត្ថបទ៖ គឹម ហុក