អ្នកលក់ផលិតផលខ្មែរ ក៏ដូចជាក្រុមអាជីវករបានអំពាវនាវទៅកាន់សាធារណជន​បន្តគាំទ្រ​ផលិត​ផល​ក្នុង​ស្រុកឲ្យច្រើនជាងផលិតផលដែលនាំចូលដើម្បីផ្ដល់កម្លាំងចិត្តដល់អ្នកផលិត ខណៈ​ក្នុង​ព្រឹត្តិការណ៍​ពិព័រណ៍ពាណិជ្ជកម្មថៃនៅកោះពេជ្រចាប់ពីថ្ងៃទី២៣ ដល់ថ្ងៃទី២៤នេះ មានពលរដ្ឋ​ជា​ច្រើន​បាន​ចូលរួមគាំទ្រផលិតផលក្នុងស្រុក។

អ្នកស្រី ម៉ន សារឿត ម្ចាស់សិប្បកម្ម ខ្មែរ ហ្គោលឌិន សៀល (Khmer Golden Silk) មកពីខេត្ត​សៀមរាប ក្នុងបទសម្ភាសន៍ជាមួយព័ត៌មាន ប៊ីធីវី នៅព្រឹកថ្ងៃទី២៤ ខែឧសភានេះថា ក្រោយ​បើក​ដំណើរ​ការ​អាជីវកម្ម ផលិតផល ដែលផលិតចេញពីស្នាដៃកូនខ្មែរសុទ្ធសាធ១០០%នេះ អ្នកស្រី​ពិត​ជា​រំភើប និងសប្បាយចិត្តណាស់ នៅ​ពេល​ដែល​ឃើញ​សម្ទុះ​នៃ​ការ​គាំទ្រ​ផលិត​ផល​ជាតិ​ជា​បន្ត​បន្ទាប់​។ ជាមួយនេះអ្នកស្រីបានសំណូមពរប្រជាពលរដ្ឋខ្មែរបន្តជួយគាំទ្រផលិតផលខ្មែរ ដើម្បីជា​កម្លាំង​ចិត្ត​ដល់អ្នកផលិត និងជួយលើកស្ទួយកុំឲ្យប្រជាជនចំណាកស្រុកជាដើម។

លោក អ៊ូ ផានិត តំណាងសិប្បកម្ម ហ្វាង តុង ផលិតកាបូប ស្បែកជើង និងខ្សែក្រវ៉ាតស្បែក ស្នាដៃ​កូន​ខ្មែរ បានលើកឡើងថា មកដល់​ពេល​នេះ​បាន​បើក​អាជីវកម្ម​ទាំង​នេះ​រយៈពេល​៣ឆ្នាំ​មក​ហើយ​។ លោកបានបន្តថា គ្រប់ផលិតផលទាំងអស់របស់សិប្បកម្មលោក ទទួលបាន​ការ​ចាប់​អារម្មណ៍​ជា​ច្រើនពីសំណាក់ភ្ញៀវជាតិ និងបរទេស ថែមទាំងលក់ដាច់ចេញច្រើនផងដែរ ទោះ​បី​ជា​ការ​ចំណេញតិច ប៉ុន្តែការគាំទ្រមានច្រើនជាបន្តបន្ទាប់។ ក្នុងឱកាសនោះលោកក៏បានអំពាវនាវប្រជាពលរដ្ឋទាំងអស់ឲ្យបន្តជួយគាំទ្រផលិតផលខ្មែរកាន់តែច្រើនថែមទៀតដើម្បីជួយបង្កើតការងារជូនពលរដ្ឋខ្មែរក៏ដូចជាជំរុញសេដ្ឋកិច្ចឲ្យរីកចម្រើនទាំងអស់​គ្នា។

សូមបញ្ជាក់ថា សមាគមពាណិជ្ជកម្មថៃប្រចាំកម្ពុជា បានចាប់ផ្តើមរៀបចំពិព័រណ៍ពាណិជ្ជកម្មថៃ នៅ​សាលពិព័រណ៍កោះពេជ្រ ចាប់ពីថ្ងៃទី២៣ ដល់២៦ ខែឧសភា ឆ្នាំ២០២៤ ក្នុងគោល​បំណង​ដើម្បី​ជំរុញ​ការ​ធ្វើពាណិជ្ជកម្ម ការវិនិយោគ និងទំនាក់ទំនងខាងផ្នែកពាណិជ្ជកម្ម រវាងប្រទេសថៃ និង​ប្រទេសកម្ពុជា ដែលស្តង់សរុបជាង ១០០ស្តង់ ក្នុងនោះផលិតផល​ក្នុង​ស្រុក​មក​ពី​តំបន់​ផ្សេង​ៗ​គ្នាចំ​នួន ១០ស្តង់ផងដែរ៕ អត្ថបទ៖ ឈិត បូរ៉ាវី