រដ្ឋមន្ត្រីការពារជាតិហ្វីលីពីន លោក ហ្គីលប៊ឺតតូ តេអូដូរ៉ូ (Gilberto Teodoro) បាននិយាយនៅថ្ងៃសុក្រ (២៤ ឧសភា) នេះថា ច្បាប់ថ្មីរបស់ចិន អំពីមធ្យោបាយដែលឆ្មាំល្បាតឆ្នេររបស់ខ្លួនអាចប្រតិបត្តិការនៅក្នុងសមុទ្រចិនខាងត្បូង គឺជាបញ្ហានៃការព្រួយបារម្ភរបស់អន្តរជាតិ ដោយពណ៌នាច្បាប់ទាំងនោះថាជាការបង្កហេតុ។

ប្រទេសចិន ដែលមានជម្លោះអធិបតេយ្យភាពដែនសមុទ្រជាមួយហ្វីលីពីន និងប្រទេសផ្សេងទៀតដែលអះអាងសិទ្ធិដែនទឹកជាន់គ្នាជាមួយចិន នៅសមុទ្រចិនខាងត្បូង បានដាក់ចេញច្បាប់ថ្មីដែលនឹងអនុវត្តច្បាប់ឆ្នាំ២០២១ ដែលអនុញ្ញាតឱ្យឆ្មាំល្បាតឆ្នេររបស់ខ្លួនអាចបាញ់ទៅលើនាវាបរទេសបាន។

ប្រទេសហ្វីលីពីន និងចិន មានការប៉ះទង្គិចដែនសមុទ្រជាច្រើនដងនៅសមុទ្រចិនខាងត្បូងក្នុងរយៈពេលប៉ុន្មានខែកន្លងមកនេះ ដែលរាប់បញ្ចូលទាំងការប្រើប្រាស់កាណុងបាញ់ទឹកដោយនាវាឆ្មាំល្បាតឆ្នេរចិន ដែលបានបំផ្លាញនាវារបស់ទីក្រុងម៉ានីល និងធ្វើឱ្យសមាជិកនាវិករងរបួស។

ជាការឆ្លើយតបនឹងការព្រួយបារម្ភ ក្រសួងការបរទេសចិន បាននិយាយនៅសប្តាហ៍នេះថា ច្បាប់ថ្មីនេះគឺដើម្បីការពារសណ្តាប់ធ្នាប់ដែនសមុទ្រប៉ុណ្ណោះ ហើយថាមិនចាំបាច់មានការព្រួយបារម្ភទេ ប្រសិនបើមិនមានការប្រព្រឹត្តខុសច្បាប់ពីបុគ្គល និងស្ថាប័នពាក់ព័ន្ធ៕