ប្រធានាធិបតីជាប់ឆ្នោតថ្មីរបស់ប្រទេសឆាដ លោក ម៉ាហាម៉ាត អ៊ីដ្រីស ដេបី(Mahamat Idriss Deby) បានស្បថចូលកាន់តំណែងបន្តវេនពីឪពុកលោក កាលពីថ្ងៃព្រហស្បតិ៍ ទី២៣ ខែឧសភា បន្ទាប់ពីរយៈពេលបីឆ្នាំ ជាមេដឹកនាំបណ្តោះអាសន្ន ក្រោមរបបយោធា នៅក្នុងប្រទេសអាហ្វ្រិកកណ្តាលមួយនេះ។

លោក Deby បានដណ្តើមអំណាច បន្ទាប់ពីក្រុមឧទ្ទាម បានសម្លាប់ឪពុករបស់លោក ជាប្រធានាធិបតីយូរអង្វែង លោក Idriss Deby ខណៈលោកកំពុងទៅសួរសុខទុក្ខកងទ័ពដែលកំពុងប្រយុទ្ធជាមួយកងជីវពល នៅភាគខាងជើងប្រទេស កាលពីឆ្នាំ២០២១។

លោក Idriss Deby ដែលមានវ័យចំណាស់ បានគ្រប់គ្រងប្រទេសឆាដ ដែលសម្បូរទៅដោយធនធានប្រេង ប៉ុន្តែជាប្រទេសក្រីក្របំផុតមួយនៅក្នុងបណ្តាប្រទេសនៅអាហ្វ្រិក ចាប់តាំងពីរដ្ឋប្រហារ នៅដើមទសវត្សរ៍ឆ្នាំ១៩៩០។

ប្រទេសឆាដ គឺជារដ្ឋដំបូងគេក្នុងចំណោមរដ្ឋចំនួន៦ ដឹកនាំដោយរបបយោធា នៅអាហ្រ្វិកខាងលិច និងអាហ្វ្រិកកណ្តាល ដែលរៀបចំការបោះឆ្នោត បន្ទាប់ពីរដ្ឋប្រហារជាបន្តបន្ទាប់ ក្នុងរយៈពេល៤ ឆ្នាំចុងក្រោយនេះ ដែលបានធ្វើឲ្យតំបន់មានអស្ថិរភាព និងគ្រោះថ្នាក់បន្ថែមទៀត។

ទោះជាយ៉ាងណា ការទទួលជ័យជម្នះរបស់ លោក Mahamat Idriss Deby ក្នុងខែនេះ បានជួបរឿងដ៏ចម្រូងចម្រាស។

លោក បានទទួលជ័យជម្នះ ៦១ភាគរយ នៃសន្លឹកឆ្នោត នៅក្នុងការបោះឆ្នោតដ៏តឹងតែង កាលពីថ្ងៃទី៦ ខែឧសភា ដែលបេក្ខជនចាញ់ឆ្នោតចំនួនពីររូប រួមមានទាំងបេក្ខជន លោក Succes Masra បានជំទាស់ពុំបានជោគជ័យ លើការចោទប្រកាន់ពីការក្លែងបន្លំសន្លឹកឆ្នោត។