កូរ៉េខាងត្បូង និងជប៉ុន បានប្រកាសនៅថ្ងៃសុក្រ (២៤ ឧសភា) នេះនូវការដាក់ទណ្ឌកម្មជាបន្តបន្ទាប់ទៅលើបុគ្គល អង្គការ និងនាវា ពាក់ព័ន្ធនឹងការផ្ទេរអាវុធរវាងកូរ៉េខាងជើង និងរុស្ស៊ី ដែលត្រូវបានចោទប្រកាន់ ក្នុងការរំលោភលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។

ក្រសួងការបរទេសរបស់ទីក្រុងសេអ៊ូល បាននិយាយថា ទណ្ឌកម្មត្រូវបានដាក់លើបុគ្គលកូរ៉េខាងជើងចំនួនប្រាំពីររូប និងនាវារុស្ស៊ីពីរគ្រឿង ជុំវិញការជួញដូរអាវុធ និងសកម្មភាពផ្សេងទៀតរវាងទីក្រុងព្យុងយ៉ាង និងទីក្រុងមូស្គូ។

ប្រទេសជប៉ុន ក៏បានប្រកាសដាក់ទណ្ឌកម្មលើអង្គការចំនួន ១១ និងបុគ្គលម្នាក់ រួមទាំងអ្វីដែលខ្លួនបាននិយាយថាក្រុមរុស្ស៊ី ដែលចូលរួមក្នុងកិច្ចសហប្រតិបត្តិការយោធាដើម្បីគាំទ្រសង្រ្គាមរបស់រុស្ស៊ី លើអ៊ុយក្រែន។

សហរដ្ឋអាមេរិក និងកូរ៉េខាងត្បូង បានចោទប្រកាន់កូរ៉េខាងជើង ថាបានផ្ទេរអាវុធទៅឱ្យរុស្ស៊ី សម្រាប់ប្រើប្រាស់ក្នុងសង្គ្រាមរបស់ខ្លួននៅអ៊ុយក្រែន។ ទីក្រុងមូស្គូ និងក្រុងព្យុងយ៉ាង បានបដិសេធការចោទប្រកាន់នេះ ប៉ុន្តែបានប្តេជ្ញាកាលពីឆ្នាំមុនថានឹងធ្វើឱ្យទំនាក់ទំនងយោធាកាន់តែស៊ីជម្រៅ៕