​បាល់ទាត់៖ ​ក្រុម​បាល់ទាត់​ស្ត្រី​អាមេរិកបាន​យកឈ្នះ​ក្រុម​ស្ត្រី​អូស្ត្រាលី ៤-៣ ក្នុង​ការ​ប្រកួត​ដណ្តើម​យក​ចំណាត់ថ្នាក់​លេខ​៣ មេដាយ​សំរឹទ្ធ​នៅ​ព្រឹត្តិការណ៍​អូឡាំពិក​ទីក្រុង​តូ​ក្យូ​។ ​​ការប្រកួត​នៅ​កីឡដ្ឋាន Kashima កីឡាការិនី Megan Rapinoe បើក​ការ​នាំមុខ​ឱ្យ​អាមេរិក​មុន​នៅ​នាទី​ទី៨ មុនពេល​ដែល Sam Kerr តាម​ស្មើ​ឱ្យ​អូស្ត្រាលី​នៅ​នាទី​ទី១៧​។

​​Megan Rapinoe ជាថ្មី​ម្តងទៀត​រកបាន​គ្រាប់​នាំមុខ​សារជាថ្មី​នៅ​នាទី​ទី២១ មុន​ពេលដែល​កីឡាការិនី​ជើងចាស់​អាមេរិក Carli Lloyd បង្កើន​ការនាំ​មុខ ៣-១ ឱ្យ​អាមេរិក​។ ​​ចូល​វគ្គ​ទី២ Carli Lloyd ក៏​រកបាន​គ្រាប់​ទី២ របស់ខ្លួន​ និង​ជា​គ្រាប់​នាំមុខ ៤-១ មុន​ពេលដែល​អូស្ត្រាលី​តប​បាន​ ២​គ្រាប់​វិញ​ដោយ Caitlin Foord និង Emily Gielnik​។​ ​​រំលឹកថា ​តាំងពី​បង្កើត​វិញ្ញ​សា​កីឡាបាល់ទាត់​ស្ត្រី​នៅ​អូឡាំពិក​ដំបូង​តាំងពី​ឆ្នាំ១៩៩៦ មានតែ​អាមេរិក​ដែល​ឈ្នះ​មេដាយមាស​អូឡាំពិក​បាន​ច្រើនជាងគេ​ដល់​ទៅ ៤លើក​ក្រៅពីនោះ​មាន ណ័​រវេ​យ ១លើក និង​អាល្លឺម៉ង់ ១លើក​។​

​​ចំណែក​ការប្រកួត​ដណ្តើម​មេដាយមាស​វិញ្ញាសា​បាល់ទាត់​ស្ត្រី​នេះ ​នឹង​ធ្វើឡើង​នៅ​ថ្ងៃ​សុក្រ​នេះ ដែលជា​ជំនួប​រវាងស៊ុយអែត និង​កាណាដា​។ ​​ការប្រកួត​នេះ​នឹងត្រូវ​លើក​ពេល​ពី​ម៉ោង ១១​ព្រឹក​នៅ​ជប៉ុនមក​ប្រកួត​វេលា​ម៉ោង ៩យប់​វិញ​ ដោយ​ព្រួយបារម្ភ​ពីបញ្ហា​អាកាសធាតុ​នៅ​ទីក្រុង​តូ​ក្យូ​៕

​អត្ថបទ​៖​នាង សុភា​វុ​ធ