ខេត្តពោធិ៍សាត់៖ នាព្រឹកថ្ងៃទី២៤ ខែឧសភា ឆ្នាំ២០២៤ ឯកឧត្តម ខូយ រីដា អភិបាល នៃគណៈ​អភិបាលខេត្តពោធិ៍សាត់ និងឯកឧត្តម ម៉ក់ រ៉ា ប្រធានក្រុមប្រឹក្សាខេត្ត បានអញ្ជើញ​ជាគណៈ​អធិបតី ក្នុងពិធីប្រកាសចូលកាន់តំណែង អភិបាលស្រុកវាលវែងថ្មី ។ ពិធីនេះត្រូវបានធ្វើឡើង នៅទីតាំងនៅសាលាស្រុកវាលវែង ស្ថិតក្នុងឃុំប្រម៉ោយ ដោយបានការចូលរួម​ពីលោកអភិបាល​រង នាយក នាយករងរដ្ឋបាលសាលាខេត្ត កងកម្លាំងប្រដាប់អាវុធ សមាជិក សមាជិកា ក្រុមប្រឹក្សា​ស្រុក គណៈអភិបាលស្រុក ក្រុមប្រឹក្សាឃុំ និងមន្ត្រីអ្នកមុខអ្នកការផ្សេងទៀត សរុបប្រមាណ​ជា៣០០នាក់។

លោក ធាង ឡេង ដែលត្រូវបានប្រកាសឱ្យចូលកាន់មុខតំណែងថ្មី ជាអភិបាលស្រុកវាលវែង ក្នុង​ពេលនេះ គឺមានឋានន្តរស័ក្តិអនុមន្ត្រី ថ្នាក់លេខ៤ (អតីតអធិការ​នៃអធិការដ្ឋាន​នគរបាល​ស្រុក​វាល​វែង) ហើយ លោក វង្ស អេង ដែលជាអភិបាលស្រុកវាលវែងចាស់ ត្រូវទៅទទួលការងារថ្មី​នៅរដ្ឋបាល​ខេត្តពោធិ៍សាត់។

ក្នុងឱកាសនោះ ឯកឧត្តម ខូយ រីដា បានថ្លែងថា មូលដ្ឋានស្រុកវាលវែង មានការអភិវឌ្ឍន៍ រួមទាំង​សេដ្ឋកិច្ច សង្គមកិច្ច បរិស្ថាន ដែលធ្វើឲ្យប្រជាពលរដ្ឋ​របស់យើង​ទទួល​បាន​នូវ​សមិទ្ធ​ផល​នានា​ជា​បន្ត​បន្ទាប់ ហើយកិច្ចការបន្តត្រូវពង្រឹងទប់ស្កាត់បទល្មើសធនធានធម្មជាតិ។ ទន្ទឹមនឹងនេះ​អាជ្ញាធរ​ស្រុក​ត្រូវពន្យល់ដល់ប្រជាពលរដ្ឋឲ្យមានករយល់ដឹងឲ្យបានច្រើនការថែទាំសុខភាព ថែម​ទាំងប្រជាពលរដ្ឋមានការយល់ដឹងកាន់តែច្រើនឡើងក្នុងការបញ្ជូនកូនបានទៅសាលារៀន ការ​យល់​ដឹង​អំពីសុវត្ថិភាព ចរាចរណ៍ផ្លូវគោក ដែលធ្វើឲ្យមានការកាត់បន្ថយគ្រោះថ្នាក់ចរាចរណ៍ និងការ​យល់ដឹងរបស់ប្រជាពលរដ្ឋ មានការខិតខំប្រឹងប្រែងរកចំណូល ដើម្បីកាត់បន្ថយ​ភាព​ក្រីក្ររ​។ ឯកឧត្តម អភិបាលខេត្ត បានយកឱកាសនោះសម្ដែងនូវអំណរគុណ និងកោត​សរសើរ​អាជ្ញាធរ​ស្រុកវាលវែង សម្រាប់ភាពជាអ្នកដឹកនាំ គ្រប់គ្រងចាត់ចែង អភិវឌ្ឍន៍ រហូតទទួលបាន​សមិទ្ធ​ផល​ជា​ច្រើន កន្លងមក ផ្តល់ផលប្រយោជន៍ដល់ប្រជាពលរដ្ឋ សាធារណៈជាធំ។ ឯកឧត្តមអភិបាលខេត្តបានថ្លែងបញ្ជាក់ថា មន្ត្រីរាជការសាធារណៈទាំងអស់ ហ៊ានធ្វើអ្វីៗ ដើម្បី​ខិតខំ​ដោះស្រាយបញ្ហាជូនប្រជាជនជនមានពិការភាព ជនក្រីក្រ ដោយគ្មានការរើសអើង និង​ហ៊ាន​ធ្វើ​អ្វី​ទាំងអស់ ដើម្បីលើកកម្ពស់ជីវភាពរស់នៅ និងសុខមាលភាព របស់ប្រជាពលរ​ដ្ឋ​នៅ​ឯ​មូលដ្ឋាន៕