ប្រព័ន្ធផ្សព្វផ្សាយអ៊ីស្រាអែល បានរាយការណ៍កាលពីព្រឹកថ្ងៃព្រហស្បតិ៍ ដោយដកស្រង់សេចក្តីថ្លែងការណ៍ពីការិយាល័យលោកនាយករដ្ឋមន្ត្រី បេនចាមីន ណេតាន់យ៉ាហ៊ូថា គណៈរដ្ឋមន្ត្រីសង្រ្គាម អ៊ីស្រាអែល បានណែនាំក្រុមចរចា ឲ្យបន្តកិច្ចខិតខំប្រឹងប្រែង ដើម្បីធានាបាននូវការដោះលែងចំណាប់ ថ្នូរ។

គណៈរដ្ឋមន្ត្រីសង្គ្រាមនេះ បានជួបគ្នាអស់រយៈពេល ៤ម៉ោង។ ខណៈដែលអ៊ីស្រាអែល និងអង្គការសកម្មប្រយុទ្ធប៉ាឡេស្ទីនហាម៉ាស មិនចរចាដោយផ្ទាល់គ្នានោះ ប្រទេសអេហ្ស៊ីប កាតា និងអាមេរិក កំពុងដើរតួជាអ្នកសម្រុះសម្រួល ក្នុងសង្គ្រាមហ្កាហ្សា។

ការចរចាជុំចុងក្រោយបំផុត បានបញ្ចប់ដោយគ្មានលទ្ធផល។ ការចរចា បានជាប់គាំង តាំងពីពេលនោះ មក។

នៅក្នុងការវាយប្រហារដែលមិនធ្លាប់មានពីមុនមកដោយក្រុមហាម៉ាស និងក្រុមជ្រុលនិយមផ្សេងទៀត នៅក្នុងតំបន់ព្រំដែនអ៊ីស្រាអែលកាលពីថ្ងៃទី៧ ខែតុលាឆ្នាំមុន មនុស្សប្រហែល ១.២០០ នាក់ ត្រូវបានសម្លាប់ និងជាង ២០០នាក់ ត្រូវបានចាប់ធ្វើជាចំណាប់ថ្នូរ នៅក្នុងតំបន់ហ្កាហ្សា។

ការវាយប្រហារនេះ បានបង្កឲ្យមានការវាយលុកយោធារបស់អ៊ីស្រាអែល នៅក្នុងតំបន់ឆ្នេរសមុទ្រដែលក្នុងនោះ មនុស្សជាង ៣៥.៧០០នាក់ ត្រូវបានសម្លាប់ រហូតមកដល់ពេលនេះ នេះបើយោងតាមអាជ្ញាធរសុខាភិបាលតំបន់ហ្កាហ្សា។ ជនរងគ្រោះភាគច្រើនជាស្ត្រី និង កុមារ។