ពុទ្ធសាសនិករាប់ម៉ឺននាក់ នៅក្នុងប្រទេសស្រីលង្កា បានសម្រុកទៅវត្តអារាមនានាដើម្បីចូលរួមក្នុងពិធីបុណ្យសាសនាដ៏សំខាន់បំផុតរបស់ខ្លួន គឺបុណ្យវិសាខបូជា កាលពីយប់ថ្ងៃព្រហស្បតិ៍ (២៣ ឧសភា) បើទោះបីជាភ្លៀងធ្លាក់មុនរដូវខ្យល់មូសុង បានបោកបក់លើប្រទេសកោះមួយនេះក្ដី។ 

ក្នុងពិធីបុណ្យ ដែលមានរយៈពេលពេញមួយសប្តាហ៍ដើម្បីប្រារព្ធការប្រសូត ត្រាស់ដឹង និងព្រះនិព្វានរបស់ព្រះពុទ្ធមួយនេះ មនុស្សម្នានាំគ្នាអុជទៀនបំភ្លឺនៅកណ្តាល និងជុំវិញរដ្ឋធានីកូឡុំបូ របស់ប្រទេស។ ផ្លូវថ្នល់ត្រូវបានលម្អរដោយភ្លើងពណ៌ ចង្កៀងគោម រូបបដិមាព្រះពុទ្ធ និងទង់សាសនា ព្រមទាំងផ្ទាំងរូបភាពផ្សេងៗ។

ចំណុចសំខាន់នៃពិធីបុណ្យនេះ គឺជាប្រពៃណីស្រីលង្កា តែមួយគត់ ដែលតូបលក់អាហារបម្រើអាហារដោយឥតគិតថ្លៃដល់ពុទ្ធសាសនិក ខណៈមនុស្សម្នាតម្រង់ជួរយ៉ាងវែងដើម្បីរង់ចាំយកអាហារ។ តូបអាហារទាំងនេះត្រូវបានបង្កើតឡើងទូទាំងប្រទេសដោយក្រុមស្ម័គ្រចិត្តតាមមូលដ្ឋាន។

ប្រទេសកោះមហាសមុទ្រឥណ្ឌា មួយនេះកំពុងប្រឈមមុខនឹងរយៈពេលដ៏លំបាកមួយដោយសារតែគ្រោះមហន្តរាយធម្មជាតិ ការផ្លាស់ប្តូរក្រោយជំងឺរាតត្បាត និងការដួលរលំសេដ្ឋកិច្ច ដែលបានប៉ះពាល់យ៉ាងខ្លាំងដល់ការប្រារព្ធពិធីនៅឆ្នាំនេះ៕