ភ្នំពេញ ៖រយៈពេល៦ខែ ឆ្នាំ២០២៤នេះ ក្នុងការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា ប្រតិភូគណបក្សនយោបាយនានានៃឧត្ដមក្រុមប្រឹក្សាពិគ្រោះ និងផ្តល់យោបល់មកពី២៩គណបក្សនយោបាយ បានផ្ដល់ទស្សនទានជិត ៣០ លើវិស័យសំខាន់ៗ ដូចជា វិស័យអប់រំ សុខាភិបាល កសិកម្ម ឧស្សាហកម្ម និងទេសចរណ៍ជាដើម ជូនដល់ប្រមុខរាជរដ្ឋាភិបាលក្នុងការពិនិត្យ និងសម្រេច។ 

​ឯកឧត្តម ឈឹម ផលវរុណ ប្រធានលេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់បានលើកឡើងថា ក្នុងឱកាសចូលរួមកិច្ចប្រជុំប្រចាំឆមាសរបស់ឧត្តមក្រុមប្រឹក្សាពិគ្រោះ និងផ្តល់យោបល់ជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី២៤ ខែឧសភា ឆ្នាំ២០២៤នេះ នៅវិមានសន្តិភាព រយៈពេល ៦ ខែមកនេះ ឧត្ដមក្រុមប្រឹក្សាពិគ្រោះ និងផ្តល់យោបល់ បានផ្ដល់ធាតុចូលជាលាយលក្ខអក្សរ ដែលហៅថា ទស្សនទាន គោរពជូនប្រមុខរាជរដ្ឋាភិបាលផ្ទាល់តែម្ដង។ 

ឯកឧត្តមបន្តថា ទស្សនទាននេះសរុបរយៈពេល ៦ ខែមកនេះ បណ្ដាគណបក្សនយោបាយទាំងអស់នៃ បានផ្ដល់ជូនទៅប្រមុខរាជរដ្ឋាភិបាលជិត ៣០ ទស្សនទាន ដែលប្រតិភូគណបក្សនីមយយៗ ផ្ដល់ទស្សនទានដោយឡែកៗពីគ្នាពីព្រោះឱ្យស្របទៅនឹងគោលបំណងចង់បាននៃការបង្កើត ឧត្ដមក្រុមប្រឹក្សាពិគ្រោះ និងផ្តល់យោបល់ គឺចូលរួមផ្ដល់នូវពហុគំនិតទៅកាន់រាជរដ្ឋាភិបាល។ ទស្សនទានទាំងនេះបានក្រសោបទៅលើវិស័យជាច្រើនមានដូចជា វិស័យអប់រំ វិស័យសុខាភិបាល វិស័យកសិកម្ម វិស័យឧស្សាហកម្ម ទេសចរណ៍ រួមជាមួយនឹងវិស័យជាច្រើនទៀត។

ឯកឧត្តម ឈឹម ផលវរុណ បានបន្តថា ក្នុងឱកាសនោះ សម្ដេចធិបតី នាយករដ្ឋមន្រ្ដី ក៏បានបញ្ជាក់យ៉ាងច្បាស់ចំពោះការគាំទ្រ ចំពោះការផ្ដល់ធាតុចូល ទស្សនទាន និងការបំពេញភារកិច្ច របស់ប្រតិភូគណបក្សនីមួយៗនៃឧត្ដមក្រុមប្រឹក្សាពិគ្រោះ និងផ្តល់យោបល់ចំពោះរាជរដ្ឋាភិបាលក្នុងរយៈពេលកន្លងមកនេះ។ 

សូមជម្រាបថា ក្រុមប្រឹក្សាពិគ្រោះ និងផ្តល់យោបល់មានភារកិច្ចចម្បងចំនួន៣រួមមាន៖ ទី១ ផ្តួចផ្តើមគំនិត ឬផ្តល់យោបល់លើការរៀបចំគោលនយោបាយនានារបស់រាជរដ្ឋាភិបាល។ ទី២ ផ្តួចផ្តើមគំនិតតាក់តែង ឬផ្តល់យោបល់លើការរៀបចំធ្វើសេចក្តីព្រាងច្បាប់ និងសេចក្តីព្រាងលិខិតបទដ្ឋានគតិយុត្តផ្សេងទៀតរបស់រាជរដ្ឋាភិបាល ក្នុងដំណាក់កាលនៃដំណើរការនីតិវិធីធ្វើច្បាប់ដែលកំពុងស្ថិតក្នុងក្របខណ្ឌអំណាចនីតិប្រតិបត្តិ និង ទី៣ តាមដានដំណើរការអនុវត្តច្បាប់ និងគោលនយោបាយរបស់រាជរដ្ឋាភិបាលទាំងនៅថ្នាក់ជាតិ ក្រោមជាតិ និងផ្តល់អនុសាសន៍កែលម្អភាពអសកម្ម និងភាពមិនប្រក្រតី៕

អត្ថបទ៖ វ៉ន ដារ៉ា