កោះកុង ៖ ឯកឧត្តម ប៊ុន លើត សមាជិកគណៈកម្មាធិការកណ្តាល និងជាប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តកោះកុង បានអញ្ជើញបិទយុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្តក្រុងស្រុក។

ឯកឧត្តម ប៊ុន លើត ប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តកោះកុង ថ្លែងក្នុងពិធីបិទយុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្តក្រុងស្រុកនៅក្នុងក្រុងខេមរភូមិន្ទថា ថ្ងៃនេះជាថ្ងៃបិទយុទ្ធនាការឃោសនាបោះឆ្នោត បន្ទាប់ពីបានប្រព្រឹត្តទៅអស់ពេល៨ថ្ងៃកន្លងទៅ។ 

រសៀលថ្ងៃទី២៤ ខែឧសភា ឆ្នាំ២០២៤នេះ ឯកឧត្តមបានវាយតម្លៃខ្ពស់ និងកោតសរសើរចំពោះថ្នាក់ដឹកនាំ និងសមាជិក សមាជិការក្រុមការងារគណបក្សប្រជាជនកម្ពុជាចុះមូលដ្ឋានទូទាំងខេត្តកោះកុង ដែលបានចូលរួមគ្រប់សកម្មភាពក្នុងយុទ្ធនាការឃោសនាប្រកបដោយស្មារតីទទួលខុសត្រូវក្នុងនាមជាគណបក្សដែលមានភាពចាស់ទុំខាងនយោបាយបង្ហាញពីការគំាទ្រនៃដំណើរការប្រជាធិបតេយ្យ បង្កនូវបរិយាកាសសេរី និងតម្លាភាពនៅគ្រប់ទីកន្លែងក្នុងក្របខណ្ឌខេត្តដោយគ្មានអំពើហិង្សា ប្រកាន់ខ្ជាប់នូវការគោរពច្បាប់ នីតិវិធី និងបទបញ្ជាទាំងឡាយរបស់គជប ក្នុងអំឡុងពេលយុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្ត ក្រុងប្រឹក្សាក្រុងស្រុក អាណត្តិទី៤ ឆ្នាំ២០២៤នេះ។

ឯកឧត្តម ប៊ុន លើត ថ្លែងអំណអរគុណដល់អាជ្ញាធរ និងសមត្ថកិច្ចពាក់ព័ន្ធគ្រប់លំដាប់ថ្នាក់ដែលបានយកចិត្តទុកដាក់ការពារថែរក្សាសន្តិសុខសណ្តាប់ធ្នាប់សាធារណៈសម្រាប់ដំណើរការយុទ្ធនាការឃោសបោះឆ្នោត ដោយបង្ហាញឱ្យឃើញបរិយាកាសនយោបាយ អព្យាក្រឹត្យ សេរី យុត្តិធម៌ ដល់គ្រប់គណបក្សនយោបាយទាំងអស់។ ចៀសវាងរាល់អំពើហិង្សានយោបាយ និងការគំរាមកំហែងនានាដែលជាលទ្ធផលប្រកបដោយផ្លែផ្កាដ៏ត្រចេះត្រចង់។

ឯកឧត្តមសមាជិកគណៈកម្មាធិការកណ្តាល និងជាប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តកោះកុង រំលេចដែរថា ជាង៤៥ឆ្នាំនេះ ក្រោយរំដោះជ័យជម្នះ ៧ មករា គណបក្សប្រជាជនកម្ពុជាបានផ្សារភ្ជាប់រួមសុខរួមទុក្ខជាមួយប្រជាជន ពុះពារឆ្លងកាត់ឧបសគ្គដឹកនាំប្រទេសឱ្យរួចផុតពីស្ថានភាពដែលវិនាសខ្ទេចខ្ទីឈានមកដល់ការអភិវឌ្ឍន៍គ្រប់វិស័យឥតឈប់ឈរឡើយប្រកបដោយមោទនភាពជាទីបំផុត។

ថ្នាក់ដឹកនាំគណបក្សប្រជាជនកម្ពុជា ប្តេជ្ញាចំពោះមុខប្រជាពលរដ្ឋថា គណបក្សនឹងអនុវត្តគោលនយោបាយរបស់ខ្លួនឱ្យបានជោគជ័យ ដើម្បីរក្សាសន្តិភាព ស្ថិរភាព សន្តិសុខ សណ្តាប់ធ្នាប់ និងសុវត្ថិភាពសង្គមឱ្យបានរឹងមាំ លើកកម្ពស់ផ្តល់សេវាសាធារណៈ កិច្ចគាំពារសង្គមជួយជនក្រីក្រ និងងាយរងគ្រោះ និងប្តេជ្ញាបង្កើតសមិទ្ធផលធំៗថ្មីៗថែមទៀតជូនជាតិមាតុភូមិ ព្រមទាំងជីវភាពរស់នៅរបស់ពលរដ្ឋកាន់តែសម្បូរសប្បាយ៕ ដោយ ៖ មករា