សិស្សសាលាជនជាតិរុស្សីអាយុ ១៤ឆ្នាំ ដេវីត (David) បានរៀនអ្វីថ្មីក្នុងខែនេះគឺ ការបាញ់ដោយត្រឹមត្រូវជាមួយ កាំភ្លើងវែងធុន Kalashnikov គឺពិបាកជាងការប្រើប្រាស់កាំភ្លើងខ្លីទៅទៀត។

ជាមួយនឹងសិស្សដទៃទៀត ដេវីត ត្រូវសាកល្បងអាវុធដែលជាផ្នែកមួយនៃការហ្វឹកហ្វឺនយោធាជាមូលដ្ឋាន ដែលជាលក្ខណៈពិសេសនៃកម្មវិធីសាលាដែលត្រូវបានដាក់បញ្ចូលក្នុងប៉ុន្មានឆ្នាំចុងក្រោយនៃសហភាពសូវៀត ប៉ុន្តែត្រូវបានណែនាំឡើងវិញ ចាប់តាំងពីការចាប់ផ្តើមនៃសង្រ្គាមរុស្ស៊ី នៅអ៊ុយក្រែន។

នៅទីក្រុងវ្ល៉ាឌីកាវកាស( Vladikavkaz) ភាគខាងត្បូងក្នុងខែនេះ ក្មេងប្រុសជំទង់ក្នុងឯកសណ្ឋានយោធា បានប្តូរវេនគ្នាបាញ់អាវុធ និងអនុវត្តជួយសង្គ្រោះបឋម ក្រោមការត្រួតពិនិត្យរបស់គ្រូបង្រៀន។

ដេវីដ ជាក្មេងប្រុសដែលមានសក់ខ្មៅ និងពាក់វ៉ែនតាខ្មៅ បាននិយាយថា៖«វាកាន់តែងាយស្រួលក្នុងបាញ់កាំភ្លើងខ្លី ហើយវាកាន់តែពិបាកក្នុងការតម្រង់ឲ្យចំគោលដៅ ដោយប្រើកាំភ្លើងវែងនោះ»។

សិស្សសាលារូបនេះ បាននិយាយថា ការហ្វឹកហាត់ប្រើអាវុធនឹង«ធ្វើឲ្យជីវិតកាន់តែងាយស្រួល»សម្រាប់រូបគេ នាពេលអនាគត។ សេវាយោធា ជាកាតព្វកិច្ចសម្រាប់បុរសវ័យជំទង់ នៅក្នុងប្រទេសរុស្ស៊ី ដែលសង្គ្រាមនៅអ៊ុយក្រែនឥឡូវនេះ បានឈានចូលដល់ឆ្នាំទី៣ ហើយនោះ។