ក្រុមបាតុករបានធ្វើបាតុកម្ម នៅកោះតៃវ៉ាន់ ខណៈដែលសមាជិកសភាគណបក្សប្រឆាំង បានបន្តដំណើរការសេចក្តីស្នើច្បាប់មួយ ដែលមានគោលបំណងកាត់បន្ថយអំណាចរបស់មេដឹកនាំថ្មី គឺលោក Lai Ching-te។

នៅថ្ងៃសុក្រ (ទី២៤ ខែឧសភា) នេះ មនុស្សរាប់ពាន់នាក់បាននាំគ្នាតវ៉ា នៅខាងក្រៅសភា ក្នុងទីក្រុងតៃប៉ិ ហើយគេរំពឹងថា នឹងមានចំនួនកាន់តែច្រើនបន្ថែមទៀត ក្នុងរយៈពេលប៉ុន្មានម៉ោងខាងមុខ។ ការដង្ហែក្បួនតវ៉ា ក៏ត្រូវបានឃើញផងដែរ នៅក្នុងទីក្រុងយ៉ាងហោចណាស់ចំនួន ៦ផ្សេងទៀត នៅទូទាំងកោះដែលមានប្រជាជន ២៣លាននាក់នេះ។

ក្រុមបាតុករដែលភាគច្រើនជាអ្នកគាំទ្រគណបក្សកំពុងកាន់អំណាច គឺគណបក្សប្រជាធិបតេយ្យជឿនលឿន (DPP) ក្រេវក្រោធនឹងពង្រាងច្បាប់ដែលដាក់ចេញដោយគណបក្សប្រឆាំង ពោលគឺជាច្បាប់ដែលនឹងពង្រីកសិទ្ធិអំណាចស៊ើបអង្កេតរបស់សមាជិកសភា។

សំណើច្បាប់កែប្រែនេះនឹងលើកកម្ពស់ការត្រួតពិនិត្យរបស់សភា ចំពោះរដ្ឋាភិបាលរបស់លោក Lai តាមរយៈការពង្រីកលទ្ធភាពស៊ើបអង្កេតរបស់សមាជិកសភា ដែលអាចកោះអញ្ជើញបុគ្គលពីមជ្ឈដ្ឋាននានា ក្នុងនោះរួមទាំងមេដឹកនាំផងដែរ ដើម្បីឲ្យទៅឆ្លើយសំណួររបស់ពួកគេ។ បុគ្គលរូបណាក៏ដោយ អាចប្រឈមនឹងការផាកពិន័យ និងផ្តន្ទាទោសព្រហ្មទណ្ឌ ប្រសិនបើរកឃើញថា ជនទាំងនោះមើលងាយស្ថាប័ននីតិប្បញ្ញត្តិ។

គណបក្ស DPP បាននិយាយថា វិសោធនកម្មនេះអាចក្លាយជាឧបករណ៍មួយ ដើម្បីឲ្យក្រុមប្រឆាំងចងរដ្ឋាភិបាលរបស់លោក Lai មិនឲ្យប្រយុទ្ធប្រឆាំងជាមួយស្ថាប័ននីតិប្បញ្ញត្តិ អំឡុងពេលលោកកាន់តំណែងរយៈពេល ៤ឆ្នាំ។ ហើយច្បាប់នេះ ក៏អាចធ្វើឲ្យប៉ះពាល់ដល់លទ្ធភាពរបស់លោក ក្នុងការបង្កើតគោលនយោបាយផងដែរ៕