ផែនការរបស់នាយករដ្ឋមន្ត្រីអង់គ្លេស លោក Rishi Sunak ក្នុងការហាមប្រាមការជក់បារី សម្រាប់ក្មេងៗជំនាន់ក្រោយ នឹងមិនក្លាយជាច្បាប់នោះទេ បន្ទាប់ពីលោកបានប្រកាសពីការបោះឆ្នោតមុនអាណត្តិ ដោយធ្វើឲ្យគ្មានពេលវេលា ដើម្បីជំរុញដល់គោលនយោបាយមួយ ក្នុងចំណោមគោលនយោបាយដ៏លេចធ្លោរបស់លោក។

លោក Sunak នៅថ្ងៃសុក្រ (ទី២៤ ខែឧសភា) នេះ បានប្រាប់អ្នកសារព័ត៌មានថា «ពិតណាស់ វាជារឿងគួរឲ្យសោកស្ដាយ ដែលការហាមប្រាមដល់ការជក់បារី មិនអាចសម្រេចបាននៅចុងបញ្ចប់នៃការប្រជុំ ដោយពិចារណាលើពេលវេលាដែលមាន»។

គួរបញ្ជាក់ថា លោក Sunak ចង់ដាក់ចេញនូវច្បាប់ប្រឆាំងការជក់បារី ដែលជាច្បាប់មួយ ក្នុងចំណោមច្បាប់ដ៏តឹងរ៉ឹងបំផុតមួយចំនួនរបស់ពិភពលោក ដោយហាមប្រាមអ្នកដែលមានអាយុ ១៥ឆ្នាំ និងអាយុក្រោមនើមិនឲ្យទិញបារី ប៉ុន្តែសេចក្ដីស្នើច្បាប់ ដែលត្រូវធ្វើឲ្យការហាមឃាត់នោះកើតឡើង មិនត្រូវបានលើកយកមកពិភាក្សាក្នុងរបៀបវារៈរបស់សភា ដែលនាំឲ្យមានការរំពឹងទុកថា ពង្រាងច្បាប់នេះនឹងត្រូវបានទុកចោល។

លោកបានប្រកាសការបោះឆ្នោតនៅថ្ងៃទី៤ ខែកក្កដា កាលថ្ងៃពុធ (ទី២២ ខែឧសភា) ដោយផ្តល់ឲ្យរដ្ឋាភិបាលតែប៉ុន្មានថ្ងៃប៉ុណ្ណោះ ដើម្បីបញ្ចប់ទាំងស្រុងនូវសកម្មភាពនីតិបញ្ញត្តិដ៏លេចធ្លោនេះ នៅក្នុងអ្វីដែលគេហៅថា រយៈពេល «លាងសម្អាត»។ នៅក្នុងសុន្ទរកថារបស់លោកដែលប្រកាសពីកាលបរិច្ឆេទការបោះឆ្នោតនោះ លោក Sunak បាននិយាយក្នុងន័យមោទនភាពថា រដ្ឋាភិបាលរបស់លោកបានធានាឲ្យមនុស្សជំនាន់ក្រោយ «គ្មានផ្សែងបារី»៕