ក្រុមអ្នកពន្លត់អគ្គិភ័យអេស្ប៉ាញ នៅថ្ងៃសុក្រ (ទី២៤ ខែឧសភា) នេះ បាននាំគ្នារើកកាយគំនរបាក់បែកនៃភោជនីយដ្ឋានបណ្ដោយឆ្នេរ នៅលើកោះវិស្សមកាល Mallorca ដោយស្វែងរកតម្រុយបន្ទាប់ពីភោជនីយដ្ឋានមួយនេះ បានបាក់រលំផ្នែកខ្លះ ដែលហេតុការណ៍នេះ បានបណ្ដាលឲ្យមនុស្ស ៤នាក់ បាត់បង់ជីវិត និង ១៦នាក់ រងរបួស។

អាជ្ញាធរដែលបានប្រកាសពីការកាន់ទុក្ខរយៈពេល ៣ថ្ងៃ មិនបានបញ្ជាក់ពីមូលហេតុភ្លាមៗនោះឡើយ ប៉ុន្តែបាននិយាយថា ការលើសទម្ងន់ ទំនងជាដើមហេតុធំបំផុត ដែលនាំឲ្យអគារបាក់រលំ។

អគារ ២ជាន់ ដែលមានមនុស្សពេញណែន បានបាក់រលំ កាលពីរសៀលថ្ងៃព្រហស្បតិ៍ (ទី២៣ ខែឧសភា) នៅតំបន់ Playa de Palma ភាគខាងត្បូងនៃរដ្ឋធានី ដោយរដូវកាលទេសចរណ៍ កំពុងចាប់ផ្ដើមមមាញឹក នៅប្រជុំកោះ Balearic ដែលរួមមានទាំងកោះ Ibiza និងកោះ Menorca ផងដែរ។

អ្នកនាំពាក្យនគរបាលបានប្រាប់ឲ្យដឹងថា ជនរងគ្រោះដែលស្លាប់ គឺជាស្ត្រីជនជាតិអាល្លឺម៉ង់ ២នាក់ ដែលម្នាក់មានអាយុ ២០ និងមា្នក់ទៀតអាយុ ៣០ឆ្នាំ បុរសជនជាតិសេណេហ្គាល់វ័យ ៤៤ឆ្នាំ ហើយនិងស្ត្រីជនជាតិអេស្ប៉ាញអាយុ ២៣ឆ្នាំ ដែលធ្វើការនៅទីកន្លែងនោះ។

អភិបាលរងទីក្រុង Palma លោក Javi Bonet បាននិយាយថា ជនជាតិអាល្លឺម៉ង់ទាំង ២នាក់នោះ កំពុងសម្រាកលំហែកាយ ខណៈដែលប្រព័ន្ធផ្សព្វផ្សាយក្នុងស្រុក បាននិយាយថា បុរសជនជាតិសេណេហ្គាល់រូបនេះ បានរស់នៅលើកោះនេះអស់រយៈពេលជាច្រើនឆ្នាំមកហើយ។

ចំណែកស្ត្រីអ្នកនាំពាក្យសេវាសង្គ្រោះបន្ទាន់ បាននិយាយថា មនុស្ស ១៦នាក់ បានរងរបួស។ ហើយតាមរយៈវេទិកាបណ្ដាញសង្គម X សេវាសង្គ្រោះបន្ទាន់បានឲ្យដឹងថា មនុស្ស ៧នាក់ បានរងរបួស «ធ្ងន់ធ្ងរខ្លាំង» និង ៩នាក់ មានរបួស «ធ្ងន់»។ ពួកគេត្រូវបានបញ្ជូនទៅមន្ទីរពេទ្យផ្សេងៗគ្នា ក្នុងរដ្ឋធានី Palma de Mallorca របស់កោះមេឌីទែរ៉ាណេនេះ៕