លោក Andrew Ruing ប្រធានសហគមន៍នៅតំបន់ Maip Mulitaka បាននិយាយថា គេភ័យខ្លាចថា មនុស្សរាប់រយនាក់ បានបាត់បង់ជីវិត បន្ទាប់ពីបំណាក់ដីដ៏ធំមួយ បានបំផ្លាញផ្ទះសម្បែងរាប់សិបខ្នង និងកប់សមាជិកគ្រួសារជាច្រើនទាំងរស់ នៅក្នុងភូមិដាច់ស្រយាលមួយ នាភាគខាងជើងប្រទេស ប៉ាពួ នូវ៉ែលហ្គីណេ នៅព្រឹកថ្ងៃសុក្រ (ទី២៤ ខែឧសភា) នេះ។

គេអាចឃើញមនុស្សកាន់អីវ៉ាន់ដាក់ ក្នុងថង់ និងទួលលើក្បាលរបស់ពួកគេ ពេលពួកគេដើរកាត់ថ្ម និងកម្ទេចកម្ទីបាក់បែក។ សារព៍ត៌មាន Reuters អាចកំណត់ទីតាំងវីដេអូពីរូបសណ្ឋានរបស់ភ្នំតាមរយៈផ្ទៃខាងក្រោយដែលត្រូវនឹងរូបភាពរបស់ផ្កាយរណប ហើយវីដេអូដែលមានការផ្ទៀងផ្ទាត់ បង្ហាញពីទិដ្ឋភាពដូចគ្នា។

លោក Ruing បាននិយាយថា នៅវេលាម៉ោងប្រហែល ៣:០០ព្រឹក បំណាក់ដីបានកើតមាននៅភូមិ Kaokalam ក្នុងខេត្ត Enga ដែលមានចម្ងាយប្រហែល ៦០០គីឡូម៉ែត្រ ភាគខាងជើងនៃរដ្ឋធានី Port Moresby។

នាយករដ្ឋមន្ត្រីលោក James Marape បាននិយាយនៅក្នុងសេចក្តីថ្លែងការណ៍មួយថា លោកមិនទាន់ត្រូវបានគេសង្ខេបប្រាប់ហេតុការណ៍ទាំងស្រុងនៅឡើយទេ ប៉ុន្តែអាជ្ញាធរកំពុងឆ្លើយតបចំពោះគ្រោះមហន្តរាយនេះ៕