​អូឡាំពិក៖ ​ឈាន​មកដល់​ថ្ងៃ​ទី​១៣ នៃ​ព្រឹត្តិការណ៍​អូឡាំពិក​រដូវក្តៅ​ទីក្រុង​តូ​ក្យូ​ប្រទេស​ជប៉ុន ប្រទេស​បា​ហា​ម៉ាស​ទីបំផុត​ដណ្តើម​បាន​មេដាយ​មាស​ដំបូង​របស់​ខ្លួន​ លើ​វិញ្ញាសា​រត់ ៤០០​ម៉ែត្រដែល​ឈ្នះ​ដោយ​កីឡាករ Steven Gardiner​។​

​​កីឡាករ​ដែល​ជា​ជើងឯក​ពិភពលោក​រូប​នេះ​ បាន​រត់​មក​ដល់ទី​ព្រ័ត្រ​មុនគេ​ប្រើ​ថេរវេលា ៤៣​វិនាទី ៨៥​។​ ​វិញ្ញាសា​នេះដែរ កីឡាករ​កូ​ឡុំ​ប៊ី Anthony Zambrano បាន​មេដាយប្រាក់ ខណៈ​ម្ចាស់​មេដាយ​មាស​អូឡាំពិក ២០១២ នៅ​ទីក្រុង​ឡុង​ដ៍ Kirani James មកពី Grenada បាន​មេដាយសំរឹទ្ធ​។​ ​ងាក​មក​វិញ្ញាសា​ដេ​កា​ត្លុង​ផ្នែក​បុរស Damian Warner របស់​កាណាដា​ជា​អ្នកឈ្នះ​មេដាយមាស​ជាមួយនឹង​ពិន្ទុ​ជា​កំណត់ត្រា​អូឡាំពិក ៩០១៨ពិន្ទុ​។ កីឡាករ​បារាំង Kevin Mayer បាន​មេដាយប្រាក់ និង​កីឡាករ​អូស្ត្រាលី Ashley Moloney បាន​មេដាយសំរឹទ្ធ​។​

​​ចំណែក​វិញ្ញាសា​កីឡា​ហេ​ប​តា​ត្លុង​ផ្នែក​នារី កីឡាការិនី​ប៊ែ​ល​ហ្ស៊ិ​ក Nafissatou Thiam ជា​អ្នកឈ្នះ​មេដាយ​មាស​ ទោះ​បញ្ចប់​ដំណាក់កាល​ចុងក្រោយ​រត់ ៨០០​ម៉ែត្រ​នៅ​លេខ​៧ ក៏ដោយ ពោល​គឺ​កីឡា​ការិនី​វ័យ ២៦​ឆ្នាំ​រូប​នេះ​មាន​ពិន្ទុសរុប ៦៧៩១​ពិន្ទុ​ពីលើ​អ្នក​លេខ​២ មេដាយ​ប្រាក់​កីឡា​ការិនី​ហូ​ឡង់ Anouk Vetter និង​មេដាយ​សំរឹទ្ធ​បាន​ទៅ​កីឡា​ការិនី Emma Oosterwegel​។​

​​វិញ្ញាសា​ជា​បន្ត​កីឡា​ការិនី​អាមេរិក Katie Nageotte ឈ្នះ​មេដាយ​មាស​កីឡា​ចោល​ថ្នោល​ក្រោយ​ចោល​បាន ៤.៩០​ម៉ែត្រ ខណៈ​មេដាយ​ប្រាក់​បាន​ទៅ​កីឡាការិនី​រុស្ស៊ី Anzhelika Sidorova និង​មេដាយ​សំរឹទ្ធ​កីឡា​ការិនី​អង់គ្លេស Holly Bradshaw​។ ​ចំណែក​ការប្រកួត​កីឡា​ដើរ​ប្រណាំង​ផ្នែក​បុរស កីឡាករ​អ៊ីតាលី Massimo Stano ឈ្នះ​មេដាយ​មាស​ដោយ​មកដល់​ទី​ព្រ័ត្រ​មុន​អ្នក​លេខ​ពីរ ៩​វិនាទី​គឺ​កីឡា​ការិនី​ជប៉ុន Koki Ikeda និង​មេដាយសំរឹទ្ធ Toshikazu Yamanishi៕

​អត្ថបទ​៖​នាង សុភា​វុ​ធ