ប្រធានាធិបតីឥណ្ឌា លោកស្រី Droupadi Murmu អនុប្រធានាធិបតី លោក Jagdeep Dhankhar និងបណ្ដាមេដឹកនាំនយោបាយជាន់ខ្ពស់ដទៃទៀត បាននាំគ្នាទៅទម្លាក់សន្លឹកឆ្នោតរបស់ពួកគេទៅក្នុងធុង នៅឯរដ្ឋធានីរបស់ប្រទេសឥណ្ឌា នាថ្ងៃសៅរ៍ (ទី២៥ ខែឧសភា) នេះ ដោយនេះជាដំណាក់កាលទី៦ នៃការបោះឆ្នោតដែលកំពុងបន្តមាន។

មេដឹកនាំគណបក្សប្រឆាំង និងជារដ្ឋមន្ត្រីប្រចាំរដ្ឋធានីជាតិ Delhi លោក Arvind Kejriwal ដែលការធានាឲ្យនៅក្រៅឃុំបន្ទាប់ពីការឃុំខ្លួនបណ្តោះអាសន្នជិត ២ខែ នៅក្នុងសំណុំរឿងពុករលួយ បានផ្តល់កម្លាំងជំរុញថ្មីដល់យុទ្ធនាការប្រឆាំងនោះ ក៏បានទៅបោះឆ្នោតនៅក្នុងរដ្ឋធានីផងដែរ។

លោក Kejriwal ដែលជាអ្នករិះគន់ឥតញញើតញញើម ចំពោះនាយករដ្ឋមន្ត្រីឥណ្ឌា លោក Narendra Modi បានជំរុញឲ្យអ្នកបោះឆ្នោតនៅរដ្ឋធានីជាតិ Delhi ចេញទៅអនុវត្តសិទ្ធិបោះឆ្នោតរបស់ពួកគេឲ្យបានច្រើន ទោះបីជាស្ថិតក្នុងស្ថានភាពរលកកម្ដៅក្ដៅខ្លាំងក៏ដោយ។

ក្នុងពេលជាមួយគ្នានេះ មេដឹកនាំគណបក្សប្រជាធិបតេយ្យប្រជាមានិត (PDP) គឺលោកស្រី Mehbooba Mufti បានអង្គុយនៅលើដងផ្លូវ ដើម្បីបង្ហាញការតវ៉ាប្រឆាំងនឹងការចាប់ខ្លួនសមាជិកគណបក្សរបស់នាង ដែលបានរារាំងពួកគេមិនឲ្យទៅបោះឆ្នោតនៅក្នុងតំបន់ Kashmir របស់ឥណ្ឌា។

គួរបញ្ជាក់ថា ប្រជាជនជាង ១១១លាននាក់ នៅក្នុងមណ្ឌលបោះឆ្នោតចំនួន ៥៨មណ្ឌល នៅទូទាំងរដ្ឋ និងដែនដីសហព័ន្ធចំនួន៨ មានសិទ្ធិបោះឆ្នោតនៅក្នុងដំណាក់កាលទី៦ នៃការបោះឆ្នោតសកល ដែលបានកត់ត្រាចំនួនអ្នកទៅបោះឆ្នោត ១០,៨២ភាគរយ ក្នុងរយៈពេល ២ម៉ោងដំបូងនៃការបោះឆ្នោតរយៈពេល ១១ម៉ោងនេះ។

ចំនួនអ្នកចេញទៅបោះឆ្នោតសរុប នៅក្នុងដំណាក់កាលដូចគ្នានៃការបោះឆ្នោតចុងក្រោយ កាលពីឆ្នាំ២០១៩ គឺប្រហែល ៦៣ភាគរយ។ ការបោះឆ្នោតបានចាប់ផ្តើមនៅថ្ងៃទី១៩ ខែមេសា ហើយនឹងបញ្ចប់នៅថ្ងៃទី១ ខែមិថុនា ដោយការរាប់សន្លឹកឆ្នោត គ្រោងនឹងធ្វើនៅថ្ងៃទី៤ ខែមិថុនា៕