រដ្ឋមន្ត្រីការបរទេសអ៊ីតាលី លោក Antonio Tajani នៅថ្ងៃសៅរ៍ (ទី២៥ ខែឧសភា) បាននិយាយថា ប្រទេសអ៊ីតាលី នឹងបន្តផ្តល់មូលនិធិ សម្រាប់អង្គការផ្ដល់ជំនួយសង្គ្រោះប៉ាឡេស្ទីន UNRWA ដែលជាផ្នែកនៃកញ្ចប់ជំនួយចំនួន ៣៥លានអឺរ៉ូ (៣៨លានដុល្លារ)។

លោក Tajani បានធ្វើការប្តេជ្ញាចិត្ត អំឡុងកិច្ចប្រជុំនៅទីក្រុងរ៉ូម ជាមួយមេដឹកនាំប៉ាឡេស្ទីន លោក Mohammad Mustafa។ រដ្ឋមន្ត្រីអ៊ីតាលីរូបនេះបានប្រាប់ថា ទឹកប្រាក់ ៥លានអឺរ៉ូ នឹងផ្ដល់ឲ្យទៅគម្រោងរបស់ UNRWA ដោយចំនួននៅសល់ទុកប្រើប្រាស់សម្រាប់គំនិតផ្តួចផ្តើម «អាហារសម្រាប់តំបន់ហ្កាហ្សា» របស់ខ្លួន។

គួរបញ្ជាក់ថា អ៊ីតាលីគឺជាប្រទេសមួយក្នុងចំណោមប្រទេសមួយចំនួន ដែលបញ្ឈប់ការផ្ដល់ជំនួយដល់ UNRWA បន្ទាប់ពីមានការចោទប្រកាន់របស់អ៊ីស្រាអែល ដែលថា បុគ្គលិកមួយចំនួនរបស់ទីភ្នាក់ងារនេះ បានជាប់ពាក់ព័ន្ធក្នុងការវាយប្រហាររបស់ពួកហាម៉ាសកាលពីថ្ងៃទី៧ ខែតុលា លើអ៊ីស្រាអែល ដែលបង្កឲ្យមានសង្គ្រាម នៅតំបន់ហ្កាហ្សា។

លោក Tajani បាននិយាយថា៖ «ប្រទេសអ៊ីតាលីបានសម្រេចបន្តផ្តល់ហិរញ្ញប្បទានឡើងវិញនូវគម្រោងជាក់លាក់មួយចំនួន ដែលមានបំណងជួយជនភៀសខ្លួនប៉ាឡេស្ទីន ប៉ុន្តែការផ្ដល់នោះធ្វើឡើងបន្ទាប់ពីការត្រួតពិនិត្យយ៉ាងហ្មត់ចត់ដែលធានាថា មិនមានហានិភ័យសូម្បីតែបន្តិច ដែលជំនួយត្រូវធ្លាក់ទៅជួយគាំទ្រអំពើភេរវកម្ម»៕