ភ្នំពេញ៖ ប្រមុខរាជារដ្ឋាភិបាលកម្ពុជា សម្ដេចតេជោ ហ៊ុន សែន បានបញ្ជាទៅអភិបាលរាជធានី និងខេត្តទាំងអស់ ឱ្យរៀបចំមណ្ឌលចត្តាឡីស័កបន្ថែមទៀតសម្រាប់ទទួលប្រជាពលរដ្ឋកម្ពុជា ដែលកំពុងសម្រុកវិលត្រឡប់មកពីប្រទេសថៃចូលមកស្រុកកំណើតវិញ។
ប្រមុខរាជរដ្ឋាភិបាល សម្ដេចតេជោ ហ៊ុន សែន បានបញ្ជាបែបនេះនៅក្នុងសារជាសំឡេងមួយដែលត្រូវបានចែករំលែកតាមតេឡេក្រាមនៅល្ងាចថ្ងៃនេះ។
សម្ដេចតេជោ ហ៊ុន សែន មានប្រសាសន៍ថា៖ «ដូច្នេះ សូមឯកឧត្ដមលោកជំទាវអភិបាលខេត្តរាជធានីនៅបណ្ដាខេត្ត សូមរៀបចំបន្ថែននូវទីកន្លែងដែលត្រូវធ្វើចត្តាឡីស័កសម្រាប់ទទួលបងប្អូនវិលត្រឡប់មកពីព្រំដែនកម្ពុជា-ថៃ និងក៏ដូចជាដើម្បីទទួលយកបងប្អូនដែលវិលត្រឡប់មកពីព្រំដែនកម្ពុជា-ថៃ ចូលទៅក្នុងមណ្ឌលចត្តាឡីស័កនៅតាមទីកន្លែងដែលបានរៀបចំ»។
ជាងនេះទៀត សម្ដេចតេជោ ហ៊ុន សែន ក៏បានបញ្ជាទៅអភិបាលរាជធានី និងខេត្តទាំងអស់ ឱ្យផ្ទេរអ្នកជាសះស្បើយពីជំងឺកូវីដ-១៩ដែលកំពុងធ្វើចត្តាឡីស័កនៅតាមមណ្ឌលចត្តាឡីស័កនានា ឱ្យទៅធ្វើចត្តាឡីស័កនៅតាមផ្ទះរៀងៗខ្លួនវិញ ដោយថា ដើម្បីយកទីតាំងមណ្ឌលចត្តាឡីស័កទាំងនោះសម្រាប់ពលករកម្ពុជាដែលវិលត្រឡប់មកពីប្រទេសថៃ។
សម្ដេចតេជោ ហ៊ុន សែន មានប្រសាសន៍ថា៖ «អភិបាលរាជធានីខេត្តដែលនៅខាងក្នុង ដែលមានពលករវិលត្រឡប់មកវិញ ត្រូវរៀបចំឱ្យបានច្បាស់លាស់ ដោយខិតខំបញ្ជូនអ្នកដែលកំពុងធ្វើចត្តាឡីស័កនៅតាមមណ្ឌលដែលបានរៀបចំ ហើយដែលមានស្ថានភាពធូរស្រាល ឱ្យទៅធ្វើចត្តាឡីស័កនៅតាមផ្ទះរបស់ខ្លួនវិញ»។
សម្ដេចតេជោ ហ៊ុន សែន មានប្រសាសន៍បន្តថា៖ «ការធ្វើនេះ គឺក្នុងគោលដៅដើម្បីត្រៀមរៀបចំនូវទីកន្លែងសម្រាប់បងប្អូនដែលវិលត្រឡប់មកពីប្រទេសថៃ ឬមណ្ឌលចត្តាឡីស័កនៅតាមព្រំដែនកម្ពុជា-ថៃ ដើម្បីធ្វើចត្តាឡីស័កជំនួស»។
សម្ដេចតេជោ ហ៊ុន សែន មានប្រសាសន៍បន្ថែមថា៖ «អ៊ីចឹងម្ខាងគឺត្រូវរៀបចំទីកន្លែងថ្មី និងម្ខាងទៀតគឺត្រូវរៀបចំផ្ទេរអ្នកដែលកំពុងធ្វើចត្តាឡីស័កទៅធ្វើចត្តាឡីស័កនៅតាមផ្ទះរបស់ខ្លួនវិញ ដើម្បីត្រៀមបម្រុងទុកទីកន្លែងនេះសម្រាប់ទទួលបងប្អូនមកពីប្រទេសថៃ»៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
