ភ្នំពេញ ៖ ក្រសួងធម្មការនិងសាសនា ដែលជាសេនាធិ ការរបស់រាជរដ្ឋាភិបាលរួមនិងគណៈសង្ឃនាយក នឹងរៀប ចំមហាព្រឹត្តិការណ៍នៅមុខវត្តឧណ្ណាលោម គឺការបដិបត្តិសមាធិរបស់ព្រះសង្ឃ ៥ ០០០ អង្គ នៅល្ងាចថ្ងៃចន្ទ ទី២៧ ខែឧសភាឆ្នាំ២០២៤នេះ ដើម្បីឧទ្ទិសកុសលថ្វាយដួងព្រះវិញ្ញាណក្ខន្ធសម្តេចព្រះមហាសង្ឃរាជ ទេព វង្ស ។ដែលក្នុងឪកាសនោះសាធារណជនទូទៅអាចចូលរួមតាមក្ដីជ្រះថ្លាផងដែរ ។

​សម្តេចព្រះមហាអរិយវង្សបណ្ឌិត យ៉ន សេងយៀត អនុ ប្រធានលេខាធិការដ្ឋានគណៈសង្ឃនាយកនៃព្រះរាជា ណាចក្រកម្ពុជា និងជាព្រះប្រធានគណៈគ្រប់គ្រងវត្តឧណ្ណា លោម បានមានព្រះដិការប្រាប់ដល់អ្នកសារព័ត៌មាននាល្ងាចថ្ងៃទី២៥ ខែឧសភា ឆ្នាំ២០២៤ឲ្យដឹងថា រាជរដ្ឋាភិ បាល បានសម្រេចយកថ្ងៃទី៣ ខែមិថុនា ឆ្នាំ ២០២៤ ជាថ្ងៃបូជាថ្វាយព្រះភ្លើងដល់ព្រះបរមសព សម្តេចព្រះអគ្គមហា សង្ឃរាជ នៃព្រះរាជាណាចក្រកម្ពុជា ។ហេតុនេះរាជរដ្ឋាភិ បាលកម្ពុជា ក្រសួងធម្មការនិងសាសនា និងគណៈសង្ឃនាយកនៃព្រះរាជាណាចក្រកម្ពុជា បានសម្រេចរៀបចំមហាព្រឹត្តិការណ៍មួយគឺការបដិបត្តិសមាធិ ដោយមានព្រះសង្ឃចំនួន ៥.០០០ អង្គ និមន្តចូលរួម ហើយព្រះសង្ឃ និងពុទ្ធបរិស័ទ និងជនានុជនជិតឆ្ងាយក៏អាចនិមន្ត និងអញ្ជើញចូលរួមតាមសេចក្ដីជ្រះថ្លាដោយពុំមានកំណត់ចំនួននោះឡើយនាវេលាល្ងាចថ្ងៃចន្ទ ទី២៧ ខែឧសភាឆ្នាំ២០២៤នេះ ដើម្បីឧទ្ទិសកុសលថ្វាយដួងព្រះវិញ្ញាណក្ខន្ធសម្តេចព្រះមហាសង្ឃរាជ ទេព វង្ស ។ 

ទោះយ៉ាងណា សម្តេចព្រះមហាអរិយវង្សបណ្ឌិត យ៉ន សេងយៀត បានបញ្ជាក់បន្តថា ដោយសារព្រឹត្តិការណ៍នេះ មានព្រះសង្ឃច្រើននិមន្តចូលរួម ហេតុនេះគណៈកម្មការ រៀបចំអាសនៈ ពោលគឺកន្លែងគង់ធ្វើសមាធិ សម្រាប់តែព្រះសង្ឃ ៥ ០០០ អង្គ ប៉ុណ្ណោះ ចំណែកព្រះសង្ឃ ពុទ្ធ បរិស័ទ និងជនានុជនជិតឆ្ងាយ ដែលនឹងនិមន្តអញ្ជើញចូលរួមក្នុងពិធីសមាធិនោះ សូមមេត្តានាំគ្រឿងសម្រាប់គង់ ឬអង្គុយ ដូចជាកម្រាលជាដើមដោយអង្គ និង ខ្លួនឯង ហើយក្រុមការងារនឹងរៀបចំទីតាំងសម្រាប់ប្រគេន និងជូនដោយ សមគួរ ។

សូមបញ្ជាក់ថា ព្រឹត្តិការណ៍ដ៏មហាកុសលនិងមហា សាមគ្គីនេះ កិច្ចានុកិច្ចនឹងចាប់ផ្ដើមតាំងពីម៉ោង ៣ រសៀល នាថ្ងៃចន្ទ ទី២៧ ខែឧសភា ឆ្នាំ២០២៤ នៅទីលានមុខវត្ត ឧណ្ណាលោម ខាងជើងព្រះបរមរាជវាំង ហើយកិច្ចសមាធិ នឹងចាប់ផ្ដើមនៅម៉ោង ៥ ល្ងាចតទៅ ៕ អត្ថបទ ៖ ភារម្យ