ភ្នំពេញ៖ ការបោះឆ្នោតជ្រេីសរេីសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណិត្តទី៤ នៅការិយាល័យបោះឆ្នោត ០០០៦ ក្នុងខណ្ឌមានជ័យ គិតត្រឹមរសៀលថ្ងៃទី២៦ ខែឧសភានេះបានដំណេីរការដោយភាពល្អប្រសេីរនិងគ្មានភាពអវិជ្ជមាននោះទេ។ 

យោងតាមលោក ប៉ុក សុភ័ក្ត្រ ប្រធានការិយាល័យបោះឆ្នោត០០០៦ ខណ្ឌមានជ័យ បានឲ្យព័ត៌មឆន ប៊ីធីវី ដឹងថា ចាប់តាំងពីព្រឹករហូតមកដល់ពេលនេះ ចំពោះការិយាល័យបោះឆ្នោត០០០៦ អ្នកចូលរួមបោះឆ្នោតដែលបានបង្ហាញវត្តមានមានចំនួន ៧៦នាក់ ក្នុងចំនួនសរុប ៧៧នាក់។ លោកឲ្យដឹងទៀតថា ការបោះឆ្នោតក្រុមប្រឹក្សានេះ ពិតជាមានតម្លាភាព ត្រឹមត្រូវ យុត្តិធម៌ និងរក្សាការសម្ងាត់ ជាពិសេសគឺគ្មានការបង្ខិតបង្ខំ ឬកំរាមគំហែងពីជនណាម្នាក់ឡេីយ។ 

លោក ឡាយ អូន ភ្នាក់ងារអង្កេតការណ៍មកពីគណបក្សប្រជាជនកម្ពុជា បានឲ្យប៊ីធីវី ដឹងដែរថា ទិដ្ឋភាពជារួមក្នុងការិយាល័យបោះឆ្នោត០០០៦ ខណ្ឌមានជ័យនេះ ទាំងការរៀបចំ និងអ្នកចូលរួមបោះឆ្នោតទាំងអស់ គឺប្រព្រឹត្តទៅដោយរលូននិងល្អប្រសេីរ ព្រមជាមួយទឹកមុខសប្បាយរីករាយគ្រប់ៗគ្នា។

សូមជម្រាបជូនថា ការិយាល័យបោះឆ្នោត០០០៦ ខណ្ឌមានជ័ហ មានគណបក្សនយោបាយចូលរួមចំនួន៥ មានដូចជា គណបក្សប្រជាជនកម្ពុជា, គណបក្សឆន្ទៈខ្មែរ, គណបក្សហ្វ៊ុនស៊ិនប៉ិច, គណបក្សខ្មែររួបរួមជាតិ និងគណបក្សកម្លាំងជាតិ។ ដោយឡែក អ្នកអង្កេតការណ៍ និងតាមដានមានចំនួនជាង១០នាក់ មកពីសមាគមនារីកម្ពុជា , សហភាពសហព័ន្ធយុវជនកម្ពុជា (ស.ស.យ.ក) , ភ្នាក់ងារអង្កេតការណ៍ និងអ្នកអង្កេតការណ៍ជាតិ៕

អត្ថបទ ៖ ឈិត បូរ៉ាវី