ក្រុមមន្ត្រីក្នុងតំបន់បាននិយាយកាលពីថ្ងៃសៅរ៍ថា ព្យុះភ្លៀង និងទឹកជំនន់ថ្មីទៀត បានឆក់យកជីវិតមនុស្ស១៧ នាក់ និង១១នាក់ របួស នៅខេត្ត ហ្វាយ៉ាប់ (Faryab) និងខេត្ត សារី ពុល (Sari Pul)ដែលនៅជិតខាង ក្នុងភាគខាងជើងប្រទេសអាហ្វហ្គានីស្ថាន ក្នុងរយៈពេលពីរថ្ងៃកន្លងមកនេះ។

អ្នកនាំពាក្យរដ្ឋាភិបាលខេត្ត លោក អ៊ីស្មាទូឡា ម៉ូរ៉ាឌី (Esmatullah Muradi) បាននិយាយថា នៅក្នុងស្រុក ឡាវឡាស់ (Lawlash) នៃខេត្ត ហ្វាយ៉ាប់ ថា មនុស្ស១២ នាក់បានស្លាប់ និង១១នាក់ផ្សេងទៀតបានរងរបួសដោយសារតែភ្លៀងធ្លាក់ និងទឹកជំនន់ដ៏គំហុកចាប់តាំងពីថ្ងៃសុក្រសប្ដាហ៍មុនមក។

មន្ត្រីបាននិយាយថា ស្ត្រី និងកុមារ ស្ថិតក្នុងចំណោមជនរងគ្រោះទាំងនោះ។

យោងតាមអ្នកនាំពាក្យរដ្ឋាភិបាលខេត្ត លោក ហាប៊ីប៊ូឡាម៉ាស្រ (Habibullah Masror) បានបញ្ជាក់ ថា ស្រដៀងគ្នានេះដែរ គ្រោះធម្មជាតិនេះ បានបណ្តាលឲ្យស្ត្រី៤នាក់ និងកុមារម្នាក់ ស្លាប់នៅក្នុងខេត្តសារីពុល ក្នុងរយៈពេលពីរថ្ងៃកន្លងមកនេះ។ 

ភ្លៀងធ្លាក់ខ្លាំង និងទឹកជំនន់ដ៏គំហុក បានសម្លាប់មនុស្សរាប់រយនាក់ បំផ្លាញផ្ទះរាប់ពាន់ខ្នង និងធ្វើឱ្យមនុស្សរាប់ពាន់នាក់ទៀតបាត់បង់ផ្ទះសម្បែងក្នុងរយៈពេលមួយខែកន្លងមកនេះ នៅក្នុងប្រទេសអាហ្វហ្គានីស្ថាន ដែលបំផ្លិចបំផ្លាញដោយសង្រ្គាម។

កាលពីអំឡុងពាក់កណ្ដាលខែឧសភានេះ មនុស្សយ៉ាងហោចណាស់ជាង៣០០នាក់ បានស្លាប់នៅក្នុងទឹកជំនន់ដ៏គំហុក ក្នុងភាគខាងជើងប្រទេសអាហ្វហ្គានីស្ថាន៕