ប្រព័ន្ធផ្សព្វផ្សាយអេហ្ស៊ីប និងប្រភពសន្តិសុខប៉ាឡេស្ទីនបាននិយាយថា យ៉ាងហោចណាស់រថយន្តចំនួន ២០០ គ្រឿងដែលផ្ទុកដោយការផ្គត់ផ្គង់ជំនួយមនុស្សធម៌ បានចូលទៅក្នុងតំបន់ហ្កាហ្សាស្ទ្រីប កាលពីថ្ងៃអាទិត្យ (២៦ ឧសភា) តាមរយៈច្រកឆ្លងកាត់ កេរឹម ស្ហាលូម (Kerem Shalom) ដែលគ្រប់គ្រងដោយអ៊ីស្រាអែល។

ទូរទស្សន៍ នីល ធីវី (Nile TV) ដែលគ្រប់គ្រងដោយរដ្ឋរបស់ប្រទេសអេហ្ស៊ីបបានរាយការណ៍ថា រហូតមកដល់ពេលនេះរថយន្តដឹកទំនិញចំនួន ៩០ បានឆ្លងកាត់ច្រក កេរឹម ស្ហាលូម ចូលទៅដល់តំបន់ហ្កាហ្សា រួចរាល់ហើយ បន្ទាប់ពីត្រូវបានត្រួតពិនិត្យដោយភាគីអ៊ីស្រាអែល ដោយរថយន្តដែលនៅសល់កំពុងរង់ចាំការអនុញ្ញាតឱ្យចូលឆ្លងកាត់ជាបន្តបន្ទាប់ទៀត។

ប្រភពប៉ាឡេស្ទីនបាននិយាយថា រថយន្តដឹកទំនិញនីមួយៗបានផ្ទុកស្បៀងអាហារចំនួន ២០ តោន ខណៈដែលរថយន្ត ៤ គ្រឿងក្នុងចំណោមនោះបានដឹកប្រេងឥន្ធនៈដែលត្រូវការសម្រាប់ដំណើរការម៉ាស៊ីនភ្លើងនៅក្នុងមន្ទីរពេទ្យរបស់ហ្កាហ្សា។ ទាំងនោះគឺជាក្បួនជំនួយដំបូងដែលចូលដល់តំបន់ហ៊ុមព័ទ្ធនេះ ចាប់តាំងពីការចាប់ផ្តើមប្រតិបត្តិការយោធារបស់អ៊ីស្រាអែលនៅទីក្រុង រ៉ាហ្វា (Rafah) ភាគខាងត្បូងនៃតំបន់ហ្កាហ្សាស្ទ្រីប មក។

កងកម្លាំងការពារអ៊ីស្រាអែល (IDF) បាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យ ថា ចំនួនរថយន្តជំនួយប្រចាំសប្តាហ៍ដែលចូលតំបន់ហ្កាហ្សាស្ទ្រីប ឆ្លងកាត់ច្រក កេរឹម ស្ហាលូម និងច្រក អេរ៉េស (Erez) នៅតាមព្រំដែនអ៊ីស្រាអែល-ហ្កាហ្សា បានកើនឡើងស្ទើរតែទ្វេដងធៀបនឹងសប្តាហ៍មុន៕