លោកនាយករដ្ឋមន្ត្រីចិន លីឈាំង (Li Qiang) បានយល់ព្រមជាមួយប្រធានាធិបតីកូរ៉េខាងត្បូង លោក Yoon Suk Yeol កាលពីថ្ងៃអាទិត្យ ទី២៦ ឧសភា ដើម្បីចាប់ផ្តើមកិច្ចសន្ទនាការទូត និងសន្តិសុខ ហើយបន្តកិច្ចចរចាពាណិជ្ជកម្មសេរី និងបានពិភាក្សាពីភាពតានតឹងជុំវិញកោះតៃវ៉ាន់ជាមួយលោកនាយករដ្ឋមន្ត្រីជប៉ុន Fumio Kishida ទៀតផង ។

ក្រុមមេដឹកនាំ បានបើកកិច្ចប្រជុំទ្វេភាគីនៅទីក្រុងសេអ៊ូល មួយថ្ងៃមុនកិច្ចប្រជុំកំពូលលើកដំបូងដោយប្រទេសជិតខាងអាស៊ីទាំងបីក្នុងរយៈពេលជាង ៤ឆ្នាំ។

ចិន និងកូរ៉េខាងត្បូង ព្រមទាំងជប៉ុន ដែលជាសម្ព័ន្ធមិត្តរបស់អាមេរិក កំពុងព្យាយាមគ្រប់គ្រងការកើនឡើងការមិនទុកចិត្តគ្នា ស្របពេលមានការប្រកួតប្រជែងរវាងទីក្រុងប៉េកាំង និងវ៉ាស៊ីនតោន និងភាពតានតឹងលើកោះតៃវ៉ាន់។

ក្រុមអ្នកការទូត និងមន្ត្រីបាននិយាយថា ការរំពឹងទុកមានកម្រិតទាបសម្រាប់កិច្ចប្រជុំកំពូលត្រីភាគីនៅថ្ងៃចន្ទដើមសប្ដាហ៍នេះ ប៉ុន្តែការចាប់ដៃគ្នា ក៏អាចជួយរក្សាទំនាក់ទំនងការទូតកម្រិតខ្ពស់មួយចំនួន ផងដែរ បន្ទាប់ពីទំនាក់ទំនងកាន់តែយ៉ាប់យ៉ឺនអស់ជាច្រើនឆ្នាំមកនេះ ។

លោក Yoon បានប្រាប់ លោក Li ថាកូរ៉េខាងត្បូង និងចិន គួរតែធ្វើការជាមួយគ្នាមិនត្រឹមតែលើកកម្ពស់ផលប្រយោជន៍រួមដោយផ្អែកលើការគោរពគ្នាទៅវិញទៅមកប៉ុណ្ណោះទេ ថែមទាំងលើបញ្ហាក្នុងតំបន់ និងពិភពលោកផងដែរ ដើម្បីដោះស្រាយបញ្ហាប្រឈមរួម ដោយលើកឡើងពីការចូលលុកលុយ របស់រុស្ស៊ីលើអ៊ុយក្រែន ជម្លោះអ៊ីស្រាអែល និងក្រុមហាម៉ាស និងភាពមិនច្បាស់លាស់ផ្នែកសេដ្ឋកិច្ចពិភពលោក៕