កូរ៉េខាងជើងបានព្រមានកាលពីថ្ងៃអាទិត្យថា ខ្លួននឹងចាត់វិធានការប្រឆាំងកូរ៉េខាងត្បូង ដោយចោទប្រកាន់ថា បានបំពានព្រំដែនសមុទ្រខាងលិច។

យោងតាមសារព័ត៌មាន Yonhap ដែលមានមូលដ្ឋាននៅទីក្រុងសេអ៊ូល បានរាយការណ៍ថា ការព្រមានថ្មីនេះបានកើតឡើងមួយថ្ងៃមុនពេលមេដឹកនាំកូរ៉េខាងត្បូង ចិន និងជប៉ុន បានជួបពិភាក្សាគ្នានៅទីក្រុងសេអ៊ូល នៅថ្ងៃចន្ទនេះ សម្រាប់ការសន្ទនាត្រីភាគី។

ទីភ្នាក់ងារសារព័ត៌មានកណ្តាលកូរ៉េ (KCNA) បានរាយការណ៍ដោយដកស្រង់សេចក្តីថ្លែងការណ៍របស់អនុរដ្ឋមន្ត្រីការពារជាតិ លោក គីម កាង អ៊ីល (Kim Kang-il ) ថា មេដឹកនាំយោធាកំពូលរបស់ប្រទេសកូរ៉េខាងជើង បានដឹកនាំកងទ័ពរបស់ខ្លួនកាលពីថ្ងៃសុក្រ ឱ្យចាត់វិធានការវាយលុកប្រឆាំងនឹងការបំពានលើអធិបតេយ្យភាពរបស់ខ្លួន។

លោក Kim ត្រូវបានដកស្រង់សម្តីដោយទីភ្នាក់ងារសារព័ត៌មានខាងលើ ដោយនិយាយថា យើងព្រមានជាផ្លូវការថា យើងមិនអាចទ្រាំនឹងការបន្តការបំពានលើអធិបតេយ្យភាពដែនសមុទ្ររបស់យើងបានទៀតទេ ហើយថាយើងអាចប្រើប្រាស់ថាមពលស្វ័យការពាររបស់យើងនៅលើ ឬនៅក្រោមទឹកនៅពេលណាមួយ ។

ភាពតានតឹងនៅតែមានកម្រិតខ្ពស់នៅតាមខ្សែបន្ទាត់កំណត់ព្រំដែនខាងជើងនៃសមុទ្រលឿង ឬ (NLL) ដែលបម្រើជាព្រំដែនសមុទ្រជាក់ស្តែង។ កូរ៉េខាងជើងមិនដែលទទួលស្គាល់ខ្សែបន្ទាត់កំណត់ព្រំដែនខាងជើងនៃសមុទ្រលឿង NLL ឡើយ ហើយទាមទារ ថា ត្រូវតែមានការគូរឡើងវិញនៅភាគខាងត្បូង៕