ក្រុមអ្នកឧតុនិយមបាននិយាយកាលពីថ្ងៃអាទិត្យ (២៦ ឧសភា) ថា រលកកម្ដៅដ៏ក្ដៅគគុកលើកទីបី ដែលវាយប្រហាររដ្ឋរាប់សិបក្នុងប្រទេសម៉ិកស៊ិក នឹងអាចនាំឱ្យដល់ភ្លៀងធ្លាក់ខ្លាំង សំណុំទឹកកកធ្លាក់ និងខ្យល់កួចនៅភាគកណ្តាលនៃប្រទេស។ ការព្រមាននេះបានកើតឡើងបន្ទាប់ពីរដ្ឋធានីម៉ិកស៊ិក បានចុះបញ្ជីកម្រិតសីតុណ្ហភាពខ្ពស់បំផុតមួយទៀតគឺ ៣៤,៧ អង្សាសេកាលពីថ្ងៃមុននោះ។

គណៈកម្មាធិការគ្រប់គ្រងទឹកជាតិ (Conagua) បានរាយការណ៍ថារដ្ឋម៉ិកស៊ិកចំនួនប្រាំបី នឹងប្រឈមមុខនឹងភ្លៀងធ្លាក់ខ្លាំង ប៉ុន្តែតំបន់មួយចំនួនដូចជារដ្ឋ ហ៊ីដាលហ្គោ (Hidalgo) រដ្ឋ ពូប្លា (Puebla) និងរដ្ឋ កេរ៉េតារ៉ូ (Querétaro) អាចទទួលបានខ្យល់បក់ខ្លាំង និងព្យុះកួចក្នុងល្បឿនពី ៥០ ទៅ ៧០ គីឡូម៉ែត្រ ក្នុងមួយម៉ោង និងលទ្ធភាពនៃទឹកជំនន់។

យ៉ាងហោចណាស់ទីក្រុងរាប់សិបក្នុងប្រទេសម៉ិកស៊ិក បានបំបែកកំណត់ត្រានៃសីតុណ្ហភាពខ្ពស់រួចទៅហើយក្នុងរយៈពេលប៉ុន្មានថ្ងៃថ្មីៗនេះ នៅក្នុងរលកកម្ដៅដ៏ខ្លាំងមួយដែលបានបណ្តាលឱ្យមនុស្សយ៉ាងហោចណាស់ ៤៨ នាក់ស្លាប់ដោយសារជំងឺសុរិយរោគ ឬអាការៈថប់ដង្ហើមសន្លប់ដោយសារកម្ដៅខ្លាំង និងខ្វះជាតិទឹកក្នុងរយៈពេលពីរខែ នេះបើយោងតាមក្រសួងសុខាភិបាល។

កម្ដៅដ៏ខ្លាំងក្លាបានបណ្តាលឱ្យដាច់ភ្លើងអស់រយៈពេលជាច្រើនម៉ោងនៅក្នុងតំបន់មួយចំនួននៃប្រទេសម៉ិកស៊ិក នៅភាគខាងជើង ហើយបាននាំឱ្យមានការផ្អាកថ្នាក់រៀននៅក្នុងរដ្ឋ សាន លូអ៊ីស ផូតូស៊ី (San Luis Potosi) ភាគកណ្តាលនៃប្រទេស ដែលសីតុណ្ហភាពក្នុងសប្តាហ៍នេះឡើងដល់ ៥០ អង្សាសេម្តងទៀត៕