នៅក្នុងសេចក្តីថ្លែងការណ៍មួយ នាថ្ងៃចន្ទ (ទី២៧ ឧសភា) នេះ វិមានប្រធានាធិបតី Elysee បានឲ្យដឹងថា កងកម្លាំងចល័តចំនួន ៧ក្រុមទៀត នឹងធ្វើដំណើរទៅដល់ក្នុងពេលឆាប់ៗនេះ ក្នុងនាមជាកងកម្លាំងជំនួយបន្ថែមនៅក្នុងដែនដីនូវ៉ែល កាលេដូនី ដោយចង្អុលបង្ហាញផងដែរថា ការដាក់រដ្ឋក្នុងគ្រាអាសន្ន នឹងបញ្ចប់តាមការគ្រោងទុក នៅក្នុងទឹកដីប៉ាស៊ីហ្វិករបស់បារាំងមួយនេះ។

សូមបញ្ជាក់ថា ការដាក់រដ្ឋក្នុងគ្រាអាសន្ន គ្រោងនឹងបញ្ចប់នៅម៉ោង ៥ព្រឹក នាថ្ងៃទី២៨ ខែឧសភា នៅរដ្ឋធានី Noumea របស់ដែនដីនូវ៉ែល កាលូដេនី (ត្រូវនឹងម៉ោង ៨យប់ ថ្ងៃទី២៧ ខែឧសភា ម៉ោងនៅទីក្រុងប៉ារីស)។

មនុស្ស ៧នាក់ បានសម្លាប់ មនុស្សរាប់រយនាក់ ត្រូវបានចាប់ខ្លួន ហើយអគារ និងរថយន្តមួយចំនួនធំត្រូវបានបំផ្លាញ នៅក្នុងភាពចលាចលមួយសប្តាហ៍ដែលបង្កឡើងដោយកំណែទម្រង់ការបោះឆ្នោតដ៏ចម្រូងចម្រាស និងជំរុញដោយភាពខុសគ្នាយ៉ាងខ្លាំងក្លាខាងសេដ្ឋកិច្ច រវាងប្រជាជនជនជាតិដើមភាគតិច Kanak និងប្រជាជនមានដើមកំណើតអឺរ៉ុប។

គួរបញ្ជាក់ដែរ កាលពីល្ងាចថ្ងៃទី២៤ ខែឧសភា នគរបាលបានបាញ់សម្លាប់បុរសម្នាក់ ពោលគឺមានរយៈតែមួយថ្ងៃបន្ទាប់ពីប្រធានាធិបតីបារាំងលោក Emmanuel Macron បានទៅបំពេញទស្សនកិច្ចនៅទីនោះ ក្នុងគោលបំណងព្យាយាមបន្ធូរបន្ថយភាពតានតឹង។ ហើយការទៅដល់របស់កងអាវុធហត្ថបន្ថែមចំនួន ៤៨០នាក់ នឹងនាំឲ្យចំនួនកងកម្លាំងសន្តិសុខបារាំង នៅក្នុងដែនដីប៉ាស៊ីហ្វិកមួយនេះ កើនដល់ប្រមាណជា ៣.៥០០នាក់ហើយ។

សេចក្តីថ្លែងការណ៍បានបន្ថែមថា ការសម្រេចរបស់លោក Macron ក្នុងការមិនបន្តដាក់រដ្ឋក្នុងគ្រាអាសន្ន បង្ហាញពីបំណងប្រាថ្នារបស់ទីក្រុងប៉ារីស ក្នុងការចាប់ផ្តើមដំណើរការបន្ធូរបន្ថយ និងបង្កើតលក្ខខណ្ឌ សម្រាប់កិច្ចសន្ទនាឡើងវិញ។

សម្ព័ន្ធនយោបាយដ៏សំខាន់ដែលគាំទ្រឯករាជ្យ Kanak និង Socialist National Liberation Front ឬ FLNKS (រណសិរ្សរំដោះជាតិសង្គមនិយម) បានចេញសេចក្តីថ្លែងការណ៍មួយ កាលពីថ្ងៃទី២៥ ខែឧសភា ដោយលើកឡើងថា អាទិភាព គឺការបន្ធូរបន្ថយភាពតានតឹង ហើយដំណោះស្រាយដែលអាចសម្រេចបានតែមួយគត់ គឺ «ដំណោះស្រាយនយោបាយ និងមិនមានការគាបសង្កត់»៕