សហរដ្ឋអាមេរិក និងអឺរ៉ុប កំពុងចាត់វិធានការដើម្បីទទួលបាន ឬផលិតវ៉ាក់សាំងផ្តាសាយបក្សី H5N1 ដែលអាចត្រូវបានប្រើដើម្បីផ្ដល់ឱ្យកម្មករដែលធ្វើការប៉ះពាល់នឹងសត្វបក្សី និងសត្វគោ ដែលមានហានិភ័យខ្ពស់នៃការឆ្លង នេះបើតាមបសុពេទ្យ និងអ្នកបច្ចេកទេសមន្ទីរពិសោធន៍ ដោយនេះជាជំហានមួយដែលអ្នកជំនាញនិយាយថា អាចទប់ស្កាត់ការគំរាមកំហែងនៃជំងឺរាតត្បាត។

មន្ត្រីសហរដ្ឋអាមេរិក កាលពីសប្តាហ៍មុនបាននិយាយថា ពួកគេកំពុងធ្វើការលើប្រភេទវ៉ាក់សាំងភាគច្រើនពីក្រុមហ៊ុន ស៊ីអេសអែល សេគីរឺស (CSL Seqirus) ដែលត្រូវនឹងវីរុសបច្ចុប្បន្ន ឱ្យក្លាយទៅវ៉ាក់សាំងពេញលេញ ចំនួន ៤,៨ លានដូស។ មន្ត្រីសុខាភិបាលអ៊ឺរ៉ុប បានប្រាប់សារព័ត៌មានរ៉យទ័រ ថា ពួកគេក៏កំពុងពិភាក្សាដើម្បីទទួលបានវ៉ាក់សាំងបង្ការជំងឺរាតត្បាតរបស់ក្រុមហ៊ុននេះដែរ។

វិធានការនេះធ្វើឡើងបន្ទាប់ពីមានការរីករាលដាលយ៉ាងខ្លាំងក្លានៃជំងឺគ្រុនផ្តាសាយបក្សីប្រភេទថ្មីដែលបានលេចឡើងនៅចុងឆ្នាំ២០២០ ហើយបានបណ្តាលឱ្យចំនួនការស្លាប់ដែលមិនធ្លាប់មានពីមុនមកក្នុងចំណោមសត្វស្លាបព្រៃ និងបក្សីក្នុងស្រុក ហើយបានចាប់ផ្តើមឆ្លងលើប្រភេទថនិកសត្វជាច្រើន។

កាលពីខែមីនា មន្ត្រីអាមេរិកបានរាយការណ៍ពីការផ្ទុះឡើងដំបូងនៃវីរុសនេះនៅក្នុងសត្វគោ ដែលបានឆ្លងដល់ហ្វូងសត្វរាប់សិបក្បាលនៅក្នុងរដ្ឋចំនួនប្រាំបួន និងចម្លងដល់កម្មករទឹកដោះគោពីរនាក់។ រដ្ឋបាលចំណីអាហារ និងឱសថអាមេរិកបានប៉ាន់ប្រមាណថា ២០ ភាគរយនៃអាជីវកម្មត់ផ្គង់ទឹកដោះគោរបស់សហរដ្ឋអាមេរិក បង្ហាញសញ្ញានៃការឆ្លងមេរោគនេះ ហើយទំនងជាក្លាយជាការរីករាលដាលកាន់តែទូលំទូលាយ៕