កំពង់ឆ្នាំង៖ នៅរសៀលថ្ងៃទី២៧ ខែឧសភា ឆ្នាំ២០២៤នេះ ឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្តកំពង់ឆ្នាំង បានសម្រេចអោយមន្ត្រីបសុពេទ្យ ដុតកំទេចសាច់ទាក្លាសេចោលនៅវេលាម៉ោង៣និង០០នាទីថ្ងៃ២៧នេះ ក្រោយពីមន្ត្រីជំនាញនៃការិយាល័យផលិតកម្ម និងបសុព្យាបាល បានបញ្ជាក់ថា សាច់ទាទាំងអស់នេះខូចគុណភាពមិនអាចបរិភោគបានទេ ។

 ឯកឧត្តម ឯក ស៊ុនរស្មី បានអោយដឹងថា៖ សាច់ទាក្លាសេទម្ងន់សរុប៧២២គីឡូក្រាមនេះ បានដឹកឆ្លងកាត់ខេត្តកំពង់ឆ្នាំងកាលពីថ្ងៃទី២៦ ខែឧសភា ឆ្នាំ២០២៤ ហើយត្រូវកម្លាំងសមត្ថកិច្ចគយឃាត់បាន និងបានអោយមន្ត្រីបសុពេទ្យធ្វើការពិនិត្យសាច់ទាទាំងនោះកាលពីព្រឹកថ្ងៃទី២៧ ខែឧសភា ឆ្នាំ២០២៤ និងបានសម្រេចដុតកំទេចចោលនៅរសៀលថ្ងៃដដែលនេះតែម្តង។ ចំពោះសាច់គ្មានគុណភាពបែបនេះ ឯកឧត្តមបានស្នើអោយកម្លាំងសមត្ថកិច្ចគយខេត្ត កម្លាំងនគរបាលសេដ្ឋកិច្ចខេត្ត និងកម្លាំងពាក់ព័ន្ធដទៃទៀត ពិនិត្យអោយបានច្បាស់លាស់ទៅលើការដឹកចូលមកក្នុងខេត្ត និងការចរាចរឆ្លងខេត្ត គឺត្រូវតែឃាត់សួរនាំ បើគ្មានលិខិតអនុញាតិ ហើយបើពិនិត្យឃើញខូចគុណភាព ត្រួវតែកំទេចចោលតែម្តង ព្រោះសុខុមាលភាពប្រជាពលរដ្ឋសំខាន់ណាស់។

សូមបញ្ជាក់ជូនថា៖ នៅថ្ងៃទី២៦ ខែឧសភា ឆ្នាំ២០២៤ វេលាម៉ោង១និង៣០នាទី កម្លាំងសមត្ថកិច្ចគយនៃសាខាគយនិងរដ្ឋាករខេត្តកំពង់ឆ្នាំង បានបង្រា្កបរថយយន្តម៉ាក HIGHLANDER ពណ៌ត្រេអ៊ី ពាក់ស្លាកលេខ 2AU-5675 ធ្វើដំណើរពីរាជធានីភ្នំពេញឆ្លងកាត់ខេត្តកំពង់ឆ្នាំង ។ លុះមកដល់ចំណុចគីឡូម៉ែត្រ៦៨ ផ្លូវជាតិលេខ៥ ឃុំសែប ស្រុកកំពង់ត្រឡាច ខេត្តកំពង់ឆ្នាំង មន្រ្តីគយបានធ្វើការឃាត់រថយន្តខាងលើនោះដើម្បីត្រួតពិនិត្យ។ ជាលទ្ធផលត្រួតពិនិត្យបឋមឃើញមាន សាច់ទាដាក់ក្នុងធុងស្នោរក្លាសេ និងវេចខ្ចប់ក្នុងថង់គ្មានអនាម័យចំនួន៧២២គីឡូក្រាម ហើយពុំមានឯកសារពាក់ព័ន្ធភ្ជាប់មកជាមួយឡើយ ៕ ដោយ ៖ កាំង ហុងវាស្នា