មេធាវីរបស់ជនជាប់ចោទ បានឲ្យដឹងថា តុលាការក្នុងប្រទេសថៃ នៅថ្ងៃចន្ទ (ទី២៧ ខែឧសភា) បានកាត់ទោសដាក់ពន្ធនាគារ ចំពោះសកម្មជនដែលជាតន្ត្រីករ និងតំណាងរាស្រ្តរបស់គណបក្សប្រឆាំងពីបទប្រមាថព្រះមហាក្សត្រ ដោយនេះគឺជាការផ្ដន្ទាទោសចុងក្រោយបង្អស់លើបុគ្គល ដែលបានប្រព្រឹត្តកំហុសចំពោះច្បាប់ប្រមាថព្រះមហាក្សត្រដ៏តឹងរ៉ឹងបំផុតមួយរបស់ពិភពលោក។

គួរបញ្ជាក់ថា ច្បាប់ ដែលការពាររបបរាជានិយមដ៏មានឥទ្ធិពលរបស់ប្រទេសថៃមិនឲ្យមានការរិះគន់នោះ ត្រូវផ្តន្ទាទោសដាក់ពន្ធនាគាររហូតដល់ ១៥ឆ្នាំ សម្រាប់បទល្មើសនីមួយៗ ហើយជាច្បាប់ដ៏តឹងតែងបំផុតមួយ ក្នុងពិភពលោក។

លោកស្រី Chonthicha Jangrew អាយុ ៣១ឆ្នាំ ដែលជាសមាជិកសភារបស់គណបក្សបោះជំហានទៅមុខ (Move Forward Party) ត្រូវបានកាត់ទោសឲ្យជាប់ពន្ធនាគារ ២ឆ្នាំ ជុំវិញសុន្ទរកថា ដែលបានធ្វើឡើងកាលពីឆ្នាំ២០២១ នៅឯការតវ៉ាប្រឆាំងរដ្ឋាភិបាល។ ប៉ុន្តែមេធាវីរបស់គាត់ គឺលោកស្រី Marisa Pidsaya បានប្រាប់សារព័ត៌មាន Reuters ថា កូនក្ដីរបស់ខ្លួនត្រូវបានអនុញ្ញាត្តឲ្យនៅក្រៅឃុំ ដោយរង់ចាំការប្តឹងឧទ្ធរណ៍។

តុលាការមួយផ្សេងទៀត បានកាត់ទោសតន្ត្រីករ លោក Chaiamorn Kaewwiboonpan វ័យ ៣៥ឆ្នាំឲ្យជាប់ពន្ធនាគារ ៤ឆ្នាំ ពីបទដុតរូបព្រះឆាយាល័ក្ខណ៍របស់ព្រះមហាក្សត្រ Maha Vajiralongkorn។ រូបលោកត្រូវបានរកឃើញថា មានទោសពីបទដុតបំផ្លាញ ប្រមាថព្រះមហាក្សត្រ និងការប្រព្រឹត្តិឧក្រិដ្ឋកម្មតាមប្រព័ន្ធកុំព្យូទ័រ។

ក្រុមជំនួយផ្នែកច្បាប់ ដែលជាក្រុមមេធាវីថៃ ដើម្បីសិទ្ធិមនុស្ស បាននិយាយថា លោក Chaiamorn កំពុងស្វែងរកការនៅក្រៅឃុំ ហើយមានបំណងប្ដឹងឧទ្ធរណ៍ចំពោះការសម្រេចនេះ។

អ្នកទាំង២ បានបដិសេធពីបទប្រមាថព្រះមហាក្សត្រ ហើយតុលាការមិនទាន់ចេញសេចក្តីថ្លែងការណ៍អំពីការកាត់ទោសនេះនៅឡើយទេ៕