អ៊ីស្រាអែល៖ ក្រុមហេសបូឡាបានបាញ់រ៉ុក្កែតយ៉ាងច្រើន សំដៅមកលើប្រទេសអ៊ីស្រាអែលកាលពីថ្ងៃសុក្រ ហើយប្រទេសអ៊ីស្រាអែលបានវាយបកវិញដោយកាំភ្លើងធំ នៅក្នុងការកើនឡើងយ៉ាងខ្លាំងរវាងភាគីទាំងពីរ។
វាគឺជាថ្ងៃទី៣ នៃការវាយប្រហារនៅតាមបណ្ដោយព្រំដែន ដែលមានការប្រែប្រួលជាមួយប្រទេសលីបង់ ជាចំណុចផ្ទុះដ៏ធំមួយនៅមជ្ឈិមបូព៌ា ជាកន្លែងភាពតានតឹងរវាងអ៊ីស្រាអែល និងអ៊ីរ៉ង់ដែលគាំទ្រក្រុមហេសបូឡាបានផ្ទុះឡើងម្ដងម្កាល។ ប៉ុន្តែការលើកឡើងរបស់មន្ត្រីអ៊ីស្រាអែល និងសកម្មភាពរបស់ក្រុមហេសបូឡាបានបង្ហាញថា ភាគីទាំងពីរកំពុងព្យាយាមបញ្ចៀសជម្លោះដ៏ធំនៅពេលនេះ។ អ៊ីស្រាអែលបាននិយាយថា ខ្លួនបានបាញ់តបវិញបន្ទាប់ពីគ្រាប់រ៉ុក្កែតចំនួន ១៩គ្រាប់ត្រូវបានបាញ់ចេញពីប្រទេសលីបង់ ហើយនាយករដ្ឋមន្ត្រីលោក Naftali Bennett បានកោះប្រជុំបន្ទាន់ជាមួយមន្ត្រីការពារជាតិកំពូលរបស់ប្រទេស។ គ្មានអ្នកស្លាប់ និងរងរបួសត្រូវបានរាយការណ៍ឡើយ។
ភាពតានតឹងកើតមានឡើង នៅក្នុងពេលវេលាដ៏រសើបផ្នែកនយោបាយនៅអ៊ីស្រាអែល ដែល កំពុងព្យាយាមរក្សាសន្តិភាពនៅព្រំដែន ក្រោមបទឈប់បាញ់ដ៏ផុយស្រួយដែលបានបញ្ចប់សង្គ្រាមរយៈពេល ១១ថ្ងៃជាមួយមេដឹកនាំសកម្មប្រយុទ្ធហាម៉ាសនៅតំបន់ហ្គាហ្សា។ ក្រុមហេសបូឡាបាននិយាយនៅក្នុងសេចក្ដីថ្លែងការណ៍ថា ខ្លួនបានវាយប្រហារទៅលើវាលចំហនៅក្នុងតំបន់កសិដ្ឋាន Shebaa ដែលមានជម្លោះ។ ក្រុមនេះបាននិយាយថា បានបាញ់រ៉ុក្កែតចំនួន ១០គ្រាប់ដោយចាត់ទុកវាថា ជាការសងសឹកចំពោះការវាយប្រហារតាមអាកាស របស់អ៊ីស្រាអែលកាលពីថ្ងៃមុន។ អ៊ីស្រាអែលបាននិយាយថា ការវាយប្រហារទាំងនោះគឺជាការឆ្លើយតប ទៅនឹងការបាញ់រ៉ុក្កែតពីភាគខាងត្បូងប្រទេសលីបង់ ក្នុងរយៈពេលប៉ុន្មានថ្ងៃថ្មីៗនេះដែលមិនត្រូវបានអះអាងដោយក្រុមណាមួយឡើយ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
