ខ្យល់ និងភ្លៀងធ្លាក់ខ្លាំង បង្កឡើងដោយព្យុះស៊ីក្លូនដ៏ធំដំបូងប្រចាំឆ្នាំនេះ បានបោកបក់លើតំបន់ឆ្នេរសមុទ្ររបស់ប្រទេសឥណ្ឌា និងបង់ក្លាដែសកាលពីថ្ងៃចន្ទទី២៧ខែឧសភា ដោយបានសម្លាប់មនុស្សយ៉ាងហោចណាស់ ១៦ នាក់ និងកាត់ផ្តាច់ចរន្តអគ្គិសនីដល់រាប់លាននាក់។

អ្នកជំនាញអាកាសធាតុរបស់បង់ក្លាដែស លោកលីយ៉ាកាត់ អាលី (Liakath Ali)បាននិយាយថា ខ្យល់បក់បោកឥតឈប់ រហូតដល់ពេលយប់ ដែលធ្វើឲ្យទឹកបានហក់ឡើងខ្ពស់នៅកន្លែងជាច្រើន និងប្រព័ន្ធលូបង្ហូរទឹកមិនអាចទប់ទល់បាន។លោកបាននិយាយនៅក្នុងសេចក្តីថ្លែងការណ៍មួយថា មនុស្សជាច្រើនត្រូវបានជាប់ក្នុងទឹកជំនន់ ហើយនឹងក្លាយជាយប់ដ៏យូរមួយផ្សេងទៀតសម្រាប់មនុស្សរាប់លាននាក់ដែលមិនមានអគ្គិសនីប្រើប្រាស់ ឬគ្មានកន្លែងស្នាក់នៅ។ ហើយប្រជាពលរដ្ឋ ពុំទាន់បានដឹងនៅឡើយទេថា ផ្ទះសម្បែង ដីកសិកម្ម និងសត្វពាហនៈ រងការខូចខាតច្រើនណានោះទេ។

ព្យុះស៊ីក្លូន រីម៉ាល់ (Remal)គឺជាព្យុះទីមួយក្នុងចំណោមព្យុះតែងកើតឡើងញឹកញាប់ដែលគេរំពឹងថានឹងវាយប្រហារតំបន់ឆ្នេរសមុទ្រទំនាបនៃប្រទេសជិតខាងអាស៊ីខាងត្បូងនៅឆ្នាំនេះ ខណៈបម្រែបម្រួលអាកាសធាតុ ជំរុញឱ្យសីតុណ្ហភាពផ្ទៃសមុទ្រកើនឡើង។

មន្ត្រីឧតុនិយមបាននិយាយថា ល្បឿននៃកម្លាំងខ្យល់រហូតដល់ ១៣៥ គីឡូម៉ែត្រក្នុងមួយម៉ោង បានឆ្លងកាត់តំបន់ជុំវិញកំពង់ផែ ម៉ុនក្លា (Mongla) ភាគខាងត្បូងរបស់ប្រទេសបង់ក្លាដែស និងកោះ សាហ្គា (Sagar) ដែលនៅជាប់រដ្ឋ West Bengal របស់ប្រទេសឥណ្ឌាកាលពីល្ងាចថ្ងៃអាទិត្យ ដោយបានបោកបក់មកដល់ដីគោកនៅម៉ោងប្រហែល៩ យប់។

លោក សេលដុន យេត (Sheldon Yett) តំណាងអង្គការ UNICEF ប្រចាំប្រទេសបង់ក្លាដែស បាននិយាយថា មនុស្សជាង ៨លាន៤សែននាក់ រួមទាំងកុមារ ៣លាន២សែននាក់ ស្ថិតក្នុងហានិភ័យសុខភាពខ្ពស់ ខ្វះអាហារូបត្ថម្ភ អនាម័យ និងសុវត្ថិភាព។ ប្រធានគ្រប់គ្រងគ្រោះមហន្តរាយលោក លោក មីចាណួរ៉ាម៉ាន់ (Mijanur Rahman) បានប្រាប់សារព័ត៌មានReuters ថាមនុស្សយ៉ាងហោចណាស់១០នាក់បានស្លាប់ក្នុងប្រទេសបង់ក្លាដែស ដោយបន្ថែមថាជនរងគ្រោះមួយចំនួនបានស្លាប់នៅតាមផ្លូវទៅកាន់ទីជម្រក ឬនៅពេលផ្ទះ ឬជញ្ជាំងផ្ទះរបស់ពួកគេដួលរលំ ឬលង់ទឹកក្នុងកំឡុងព្យុះ៕