កងកម្លាំងការពារជាតិអ៊ីស្រាអែល (IDF) បានអះអាងថា «ឧបទ្ទវហេតុផ្ទុះអាវុធ» បានកើតឡើង នៅព្រំដែនប្រទេសអេហ្ស៊ីប បន្ទាប់ពីប្រព័ន្ធផ្សព្វផ្សាយអ៊ីស្រាអែល បានរាយការណ៍ពីការផ្ទុះអាវុធបាញ់តគ្នា រវាងទាហានអ៊ីស្រាអែល និងអេហ្ស៊ីប នៅច្រកឆ្លងកាត់ទីក្រុង Rafah កាលពីថ្ងៃចន្ទ។

កងកម្លាំងការពារជាតិអ៊ីស្រាអែល (IDF) និយាយថា កាលពី ពីរ បីម៉ោងមុន មានឧប្បត្តិហេតុផ្ទុះអាវុធនៅព្រំដែនប្រទេសអេហ្ស៊ីប ជាឧបទ្ទវហេតុ កំពុងស្ថិតនៅក្រោមការស៊ើបអង្កេត ហើយការសន្ទនាកំពុងប្រព្រឹត្តទៅជាមួយភាគីប្រទេសអេហ្ស៊ីប។

សារព័ត៌មាន ហ្សេរុយសាឡឹម ប៉ុស្តិ៍(Jerusalem Post) របស់អ៊ីស្រាអែល បានរាយការណ៍ថា ទាហានអេហ្ស៊ីបម្នាក់ត្រូវបានសម្លាប់ នៅក្នុងការផ្ទុះអាវុធនេះ ។

សារព័ត៌មានប្រចាំថ្ងៃ Maariv របស់អ៊ីស្រាអែល បានដកស្រង់ប្រភពព័ត៌មានពីកងកម្លាំងការពារជាតិអ៊ីស្រាអែល(IDF)ដែលបាននិយាយថា ទាហានអេហ្ស៊ីប បានបាញ់មុន ទៅលើទាហានអ៊ីស្រាអែលដែលបានបាញ់តវិញ។

ទោះជាយ៉ាងណា សារព័ត៌មាន Al Araby មានទីស្នាក់ការកណ្តាលក្នុងប្រទេសកាតា បានដកស្រង់ប្រភពព័ត៌មានពីអេហ្ស៊ីបថា កងកម្លាំងការពារជាតិអ៊ីស្រាអែល(IDF) ជាអ្នកបានចាប់ផ្តើមការវាយប្រហារមុន។

ទូរទស្សន៍ប៉ុស្តិ៍លេខ ១៣ របស់អ៊ីស្រាអែល បានរាយការណ៍កាលពីថ្ងៃចន្ទថា «ឧបទ្ទវហេតុ មិនទំនងកើតឡើងនេះ» ដែលបានកើតឡើងរវាងទាហានអ៊ីស្រាអែល និងអេហ្ស៊ីប នៅច្រកឆ្លងកាត់ទីក្រុង Rafah ។