គណៈបញ្ជាការឯកភាពខណ្ឌ៧មករា បានប្រជុំបន្តដាក់ផែនការ ដល់មន្ត្រីក្រោមឱវាទជំនាញពាក់ព័ន្ធ ពង្រឹងនិងត្រួតពិនិត្យសន្តិសុខសុវត្ថិភាព ជាពិសេសក្រុមក្មេងទំនើង ជូនដល់ប្រជាពលរដ្ឋក្នុងមូលដ្ឋានបន្ថែម។

កិច្ចប្រជុំបានធ្វើឡើង នៅថ្ងៃទី២៨ ខែឧសភា ឆ្នាំ ២០២៤ ក្រោមអធិបតីភាពលោក ថេង សុថុល ជាប្រធានគណៈបញ្ជាការឯកភាពរដ្ឋបាលខណ្ឌ៧មករា និងមានការចូលរួមពី​លោកអភិបាលរង​ខណ្ឌ លោកអធិការនគរបាលខណ្ឌ ​លោកមេបញ្ជាការមូលដ្ឋានកងរាជអាវុធហត្ថខណ្ឌ គណៈនាយករដ្ឋបាល លោក-លោកស្រីប្រធាន​ អនុប្រធានការិយាល័យទាំង១១ លោក-លោកស្រីចៅសង្កាត់ទាំង០៨ ​លោកនាយប៉ុស្ដិ៍នគរបាលរដ្ឋបាលទាំង០៨ និងមន្រ្តីពាក់ព័ន្ធ នៅសាលាខណ្ឌ៧មករា។

នៅក្នុងកិច្ចប្រជុំនេះដែរលោក ថេង សុថុល អភិបាលខណ្ឌ៧មករា បានមានប្រសាសន៍ថា សូមឲ្យមន្ត្រីជំនាញ​ពាក់ព័ន្ធបន្តរឹតបន្តឹង ពង្រឹងនិងត្រួតពិនិត្យការងារសន្តិសុខ សណ្តាប់ធ្នាប់​សាធារណៈ , ការបង្ការ​បង្រ្កាបល្បែងស៊ីសង ​និងការ​បង្ការបង្រ្កាបបទល្មើសគ្រឿងញៀន , ជាពិសេស ​ការបង្ការទប់ស្កាត់ ក្រុមក្មេងទំនើង ដែលអុកឡុក ដេញកាប់គ្នាពេញដងផ្លូវនេះឯង។

លោកអភិបាល បានបន្តទៀតថា សូមឲ្យជំនាញបន្តកំណត់មុខសញ្ញាពួកក្រុមក្មេងទំនើងទាំងនេះ ឈានដល់ការចុះបង្ក្រាប និងឃាត់ខ្លួន ​ធ្វើអប់រំ ឬចាត់ការតាមនីតិវិធីតែម្ដង ដើម្បីធានាសុខ​សុវត្ថិភាព​ជូនដល់សាធារណះជន។

គួរបញ្ជាក់ដែរ កាលពីរសៀលថ្ងៃទី២៧ ខែឧសភា ឆ្នាំ២០២៤ ម្សិលមិញ ឯកឧត្តម ឃួង ស្រេង អភិបាល​រាជធានីភ្នំពេញ និងជា​ប្រធានគណៈបញ្ជាការឯកភាពរាជធានី​ភ្នំពេញ ក្នុងកិច្ច​ប្រជុំគណៈបញ្ជាការឯកភាពរាជធានីភ្នំពេញ ​បានណែនាំឲ្យគណៈបញ្ជាការឯកភាពខណ្ឌទាំង១៤ ក៏ដូចកម្លាំង​សមត្ថកិច្ច ​បន្តបង្ក្រាបក្មេងទំនើង​ឲ្យដល់​ឬសគល់ សំដៅធ្វើយ៉ាង​ណា​នៅក្នុងមូលដ្ឋាន​របស់ខ្លួន ​គឺមិនមានក្មេងទំនើង៕អត្ថបទ៖ កុម្ភៈ