លោកនាយករដ្ឋមន្ត្រីអ៊ីស្រាអែល Benjamin Netanyahu បានប្ដេជ្ញា បន្តសង្រ្គាមតទៅទៀត ប្រឆាំងនឹងក្រុមហាម៉ាស ស្របពេលមានការថ្កោលទោសជាអន្តរជាតិ នៃការវាយប្រហារតាមអាកាសដែលបានសម្លាប់ពលរដ្ឋប៉ាឡេស្ទីន ជិត៥០នាក់ ក្នុងទីក្រុងរ៉ាហ្វា កាលពីថ្ងៃអាទិត្យចុងសប្ដាហ៍នេះ។

ក្រសួងសុខាភិបាលហ្កាហ្សា គ្រប់គ្រងដោយក្រុមហាម៉ាស បាននិយាយថា មនុស្សយ៉ាងហោចណាស់ ៤៥នាក់ បានស្លាប់ ខណៈមនុស្សរាប់រយនាក់ផ្សេងទៀត ត្រូវបានព្យាបាលរបួសភ្លើងឆេះខ្លួន បាក់ឆ្អឹង និងរបួសពីអំបែងគ្រាប់។

ថ្លែងនៅក្នុងសភា អ៊ីស្រាអែល លោក Netanyahu បាននិយាយថា ការវាយប្រហារនេះ គឺជា កំហុសឆ្គងដោយអចេតនា ប៉ុន្តែលោកបានបន្ថែមថា ខ្ញុំគ្មានចេតនា បញ្ចប់សង្រ្គាមនេះមុនពេលសម្រេចបានគោលដៅគ្រប់យ៉ាងឡើយ ។

លោកបន្តថាវា ពិតជាសំខាន់ណាស់ដែលអ៊ីស្រាអែល ត្រូវចាត់គ្រប់វិធានការអស់លទ្ធភាពទុកជាមុន ដើម្បីការពារជនស៊ីវិល និងបានទទូចថា កងកម្លាំងការពារអ៊ីស្រាអែល កំពុងប្រើប្រាស់កិច្ចខិតខំប្រឹងប្រែងល្អបំផុត កុំឲ្យប៉ះពាល់ដល់អ្នកទាំងឡាយដែលមិនជាប់ពាក់ព័ន្ធនឹងជម្លោះនេះ។

ក្នុងសេចក្ដីថ្លែងការណ៍កាលពីថ្ងៃចន្ទ អគ្គលេខាធិការអង្គការសហប្រជាជាតិ លោក António Guterres បាននិយាយថា ការវាយប្រហារនេះ បានសម្លាប់ជនស្លូតត្រង់រាប់សិបនាក់ ដែលកំពុងស្វែងរកជម្រកសុវត្ថិភាពពីជម្លោះដ៏ព្រៃផ្សៃនេះ។

អង្គការអន្តរជាតិបានរួមគ្នាថ្កោលទោសការវាយប្រហារនេះ ខណៈសហភាពអឺរ៉ុប ទទូចឲ្យអ៊ីស្រាអែលគោរពសេចក្ដីសម្រេចរបស់តុលាការយុត្តិធម៌អន្តរជាតិ (ICJ) កាលពីសប្ដាហ៍មុនឲ្យបញ្ឈប់ការកាប់សម្លាប់ពលរដ្ឋនៅក្រុងរ៉ាហ្វា៕