អាហ្វហ្គានីស្ថាន៖ ក្រុមតាលីបង់បានបាញ់សម្លាប់នាយកមជ្ឈមណ្ឌលព័ត៌មានរដ្ឋាភិបាលអាហ្វហ្គានីស្ថានកាលពីថ្ងៃសុក្រ ដែលជាការសម្លាប់ថ្មីបំផុតនៃមន្ត្រីរដ្ឋាភិបាលម្នាក់ និងកើតឡើងត្រឹមតែប៉ុន្មានថ្ងៃប៉ុណ្ណោះ ក្រោយការប៉ុនប៉ងធ្វើឃាតរដ្ឋមន្ត្រីការពារជាតិស្តីទី។
អ្នកនាំពាក្យក្រុមតាលីបង់បានប្រាប់ទីភ្នាក់ងារសារព័ត៌មាន AP ថា អ្នកប្រយុទ្ធរបស់ក្រុមបានសម្លាប់លោក Dawa Khan Menapal ដែលដឹកនាំប្រតិបត្តិការសារព័ត៌មានរបស់រដ្ឋាភិបាល សម្រាប់ប្រព័ន្ធផ្សព្វផ្សាយក្នុងស្រុក និងបរទេស។ នៅក្នុងសេចក្តីថ្លែងការណ៍អ្នកនាំពាក្យបាននិយាយថា លោក Menapal ត្រូវបានសម្លាប់នៅក្នុងការវាយប្រហារពិសេស ហើយត្រូវបានដាក់ទណ្ឌកម្មចំពោះទង្វើរបស់លោក។ ការសម្លាប់មន្ត្រីរដ្ឋាភិបាលដោយក្រុមតាលីបង់មិនមែនជារឿងចម្លែកនោះទេ ហើយការវាយប្រហារថ្មីៗជាច្រើនទៅលើជនស៊ីវិល ត្រូវបានក្រុមរដ្ឋអ៊ីស្លាមអះអាង។
សង្គ្រាមរវាងកងកម្លាំងរដ្ឋាភិបាលអាហ្វហ្កានីស្ថាន និងក្រុមតាលីបង់បានកើនឡើងខ្លាំងក្នុងរយៈពេលប៉ុន្មានខែចុងក្រោយនេះ ខណៈកងទ័ពសហរដ្ឋអាមេរិក និងអង្គការណាតូបានបញ្ចប់ការដកកងទ័ពចេញ ពីប្រទេសដែលហែកហួរដោយសង្គ្រាមមួយនេះ។ កាលពីថ្ងៃអង្គារ ការវាយប្រហារដោយគ្រាប់បែក របស់ក្រុមតាលីបង់សំដៅលើរដ្ឋមន្ត្រីការពារជាតិស្តីទីអាហ្វហ្គានីស្ថាន បណ្ដាលឲ្យមនុស្សយ៉ាងតិច ៨នាក់ស្លាប់ និងរងរបួស ២០នាក់ប៉ុន្តែរដ្ឋមន្ត្រីរូបនេះគ្មានគ្រោះថ្នាក់ឡើយ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
