ប្រធានាធិបតី អ៊ុយក្រែន លោក Volodymyr Zelenskyy បានធ្វើទស្សនកិច្ចផ្លូវការនៅប្រទេសអេស្ប៉ាញ កាលពីថ្ងៃចន្ទ និងបានចុះហត្ថលេខាលើកិច្ចព្រមព្រៀងសន្តិសុខទ្វេភាគី ជាមួយសមភាគីអេស្ប៉ាញ នាយករដ្ឋមន្ត្រី លោក Pedro Sanchez ។ ក្រោមកិច្ចព្រមព្រៀងនេះ អេស្ប៉ាញ នឹងផ្តល់ជំនួយយោធាចំនួន១ពាន់លានអឺរ៉ូ ឬប្រហែល ១,១ ពាន់លានដុល្លារ ដល់ប្រទេសអ៊ុយក្រែននៅឆ្នាំនេះ។ លោក Sanchez និយាយថា ប្រទេសអេស្ប៉ាញនឹងបញ្ជូនមីស៊ីល ប៉ាទ្រីយ៉ូត(Patriot) រថក្រោះ Leopard 2 និងគ្រាប់រំសេវទៅកាន់អ៊ុយក្រែន។ លោក Zelenskyy និយាយថា ប្រទេសរុស្ស៊ី ប្រើប្រាស់គ្រាប់បែកពីលើអាកាសស៊ីបគោលដៅជាង ៣.០០០គ្រាប់ ទៅលើប្រជាជនក្នុងមួយខែ ហើយអ៊ុយក្រែន កំពុងស្នើសុំឱ្យពិភពលោកជួយ ដោយផ្គត់ផ្គង់ដល់ប្រទេសជាមួយនឹងប្រព័ន្ធការពារដែនអាកាស ប៉ាទ្រីយ៉ូត(Patriot) យ៉ាងហោចណាស់ប្រាំពីរគ្រឿងបន្ថែមទៀត។ ការវាយប្រហាររបស់រុស្សីដោយប្រើប្រាស់គ្រាប់បែកស៊ីបគោលដៅ បានវាយប្រហារលើអគារពាណិជ្ជកម្មដ៏មមាញឹកមួយនៅភាគខាងកើតទីក្រុង Kharkiv របស់អ៊ុយក្រែន កាលពីចុងសប្តាហ៍កន្លងទៅនេះ។ អភិបាលតំបន់និយាយថា មនុស្ស១៨នាក់ត្រូវបានសម្លាប់ និង៥នាក់ផ្សេងទៀតត្រូវបានរាយការណ៍ថាកំពុងបាត់ខ្លួន។

ទន្ទឹមនឹងនេះ កាលពីថ្ងៃចន្ទ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានធ្វើទស្សនកិច្ចផ្លូវរដ្ឋទៅកាន់ប្រទេសអ៊ូសបេគីស្ថាន និងបានជួបជាមួយប្រធានាធិបតី លោក ស្សាវកាត មឺហ្សីយ៉ូយ៉េវ(Shavkat Mirziyoyev)។ លោកពូទីន បាននិយាយនៅក្នុងសន្និសីទសារព័ត៌មានថា រុស្ស៊ី បានចាប់ផ្តើមផ្គត់ផ្គង់ឧស្ម័នដល់ប្រទេសអ៊ូសបេគីស្ថាន កាលពីខែតុលា ឆ្នាំមុន។ លោក បានបង្ហាញពីបំណងក្នុងការជំរុញកិច្ចសហប្រតិបត្តិការថាមពលទ្វេភាគី ដោយនិយាយសំដៅលើគម្រោងដែលកំពុងដំណើរការ ដើម្បីបង្កើនសមត្ថភាពនៃបំពង់បង្ហូរប្រេងឆ្លងកាត់ព្រំដែន។ ប្រធានាធិបតីអ៊ូសបេគីស្ថាន បាននិយាយថា រុស្ស៊ីនឹងសាងសង់រោងចក្រថាមពលនុយក្លេអ៊ែរតូចមួយនៅអ៊ូសបេគីស្ថាន ជាគម្រោងលើកដំបូង នៅអាស៊ីកណ្តាលក្រោយសម័យសូវៀត។ កិច្ចព្រមព្រៀងនុយក្លេអ៊ែ ប្រសិនបើត្រូវបានអនុវត្ត នឹងបង្ហាញពីសមត្ថភាពរបស់រុស្ស៊ី ក្នុងការនាំចេញមិនត្រឹមតែថាមពលប៉ុណ្ណោះទេ ប៉ុន្តែថែមទាំងផលិតផលបច្ចេកវិទ្យាខ្ពស់ទៅកាន់ទីផ្សារអាស៊ីថ្មីផងដែរ នៅក្នុងពេលដែលប្រទេសលោកខាងលិច កំពុងបង្កើនសម្ពាធលើរុស្ស៊ី តាមរយៈការដាក់ទណ្ឌកម្ម។