អាជ្ញាធរចិន បាននិយាយនៅថ្ងៃអង្គារ (២៨ ឧសភា) នេះថា ការអះអាងដែលថាអ្នកមកដល់ប្រទេសចិនទាំងអស់ នឹងត្រូវប្រឈមមុខនឹងការត្រួតពិនិត្យទូរស័ព្ទដៃ ចាប់ពីថ្ងៃទី០១ ខែកក្កដា គឺជារឿងមិនពិតនោះទេ ដោយបានច្រានចោលការអះអាងទាំងនោះថាជាការបំភ្លៃការពិត ដែលធ្វើឡើងដោយ «កម្លាំងប្រឆាំងនឹងចិន»។

កាលពីថ្ងៃទី២៦ ខែមេសា ក្រសួងសន្តិសុខរដ្ឋ បានចេញឯកសារដែលខ្លួនបាននិយាយថា ពង្រីកលទ្ធភាពនៃការអនុវត្តច្បាប់ប្រឆាំងចារកម្ម និងជួយប្រយុទ្ធប្រឆាំងនឹងសកម្មភាពខុសច្បាប់ ដែលបង្កហានិភ័យដល់សន្តិសុខជាតិ។

ក្រសួងបាននិយាយនៅក្នុងសេចក្តីថ្លែងការណ៍មួយនៅលើគណនី វីឆាត (Wechat) របស់ខ្លួនថា ច្បាប់សន្តិសុខជាតិថ្មីបានទាក់ទាញការចាប់អារម្មណ៍ពីសាធារណជន និងមតិវិជ្ជមាន ហើយថាច្បាប់ប្រឆាំងចារកម្ម ដែលបានធ្វើវិសោធនកម្មថ្មីនេះ កំណត់បទប្បញ្ញត្តិជាក់លាក់លើការត្រួតពិនិត្យដោយស្របច្បាប់លើឧបករណ៍អេឡិចត្រូនិក និងសម្ភារៈបរិក្ខារ។

ក្រសួងបន្ថែមថា គោលដៅនៃការត្រួតពិនិត្យបែបនេះត្រូវតែជា «បុគ្គល ឬអង្គការដែលទាក់ទងនឹងការងារប្រឆាំងចារកម្មប៉ុណ្ណោះ ដូចជាអ្នកស៊ើបការណ៍ដែលសង្ស័យថាថតរូប ឬវីដេអូនៅក្នុងតំបន់ហាមឃាត់យោធា ឬអង្គភាពសម្ងាត់ជាដើម»។

ការអនុវត្តប្រឆាំងចារកម្មថ្មីនេះ កើតឡើងបន្ទាប់ពីសមាជិកសភាចិនបានពង្រីកច្បាប់ការណ៍សម្ងាត់រដ្ឋនៅឆ្នាំនេះ ជាលើកដំបូងចាប់តាំងពីឆ្នាំ២០១០ ដោយបានពង្រីកវិសាលភាពនៃការរឹតបន្តឹងព័ត៌មានរសើប ដោយរួមបញ្ចូលនូវអ្វីដែលត្រូវបានពិពណ៌នាថាជា «អាថ៌កំបាំងការងារ»៕