ដោយរស់នៅក្នុងស្ថានភាពដូចឡកម្តៅនៅកណ្តាលផ្លូវជាតិ ខណៈពួកគេស៊ូទ្រាំទប់ទល់នឹងរលកកម្តៅដែលវាយលុកយ៉ាងខ្លាំង កសិករឥណ្ឌារាប់រយនាក់ដែលបានមកបោះជំរំ រយៈពេលជាង១០០ ថ្ងៃ រវាងរដ្ឋពុនចាប(Punjab) និងរដ្ឋហារីយ៉ាណា(Haryana) បន្តទាមទារតម្លៃកសិផលរបស់ពួកគេកាន់តែល្អប្រសើរ។ ទោះបីមានរលកកម្តៅក្តៅខ្លាំង បានវាយលុកនៅតំបន់ធំៗនៅភាគខាងជើងប្រទេសឥណ្ឌាក៏ដោយ ក៏កសិករ បានទៅបោះទីតាំង នៅព្រំដែន Shambhu ចាប់តាំងពីការតវ៉ារបស់ពួកគេ ចាប់ផ្តើមកាលពីពាក់កណ្តាល ខែ កុម្ភៈ មក។ ប៉ុន្តែ ការរស់នៅក្នុងជំរំបណ្ដោះអាសន្នដែលធ្វើនៅលើរម៉កកន្ទុយត្រាក់ទ័រគ្របដោយក្រណាត់តង់ អាចធ្វើឱ្យសីតុណ្ហភាពឡើងដល់ ៤៥ទៅ៤៦ អង្សាសេ ដែលមានអារម្មណ៍ដូចជា ក្នុងសីតុណ្ហភាព៥០ អង្សាសេ។ កាលពីថ្ងៃទី១៣ ខែកុម្ភៈ កសិកររាប់ពាន់នាក់នៅរដ្ឋ Punjab បានដង្ហែបាតុកម្មមានឈ្មោះថា «តោះយើងទៅទីក្រុង Delhi» ធ្វើដំណើរដោយរថយន្តដឹកទំនិញ និងត្រាក់ទ័រ មានដឹកសម្ភារៈសម្រាប់ដេក និងស្បៀងអាហារ។ ទោះជាយ៉ាងណា កងកម្លាំងសន្តិសុខបង្ក្រាបកុបកម្ម បានប្រើឧស្ម័នបង្ហៀរទឹកភ្នែក និងកាណុងបាញ់ទឹក ដើម្បីបង្ខំឱ្យពួកគេបញ្ឈប់ក្នុងចម្ងាយប្រហែល២០០គីឡូម៉ែត្រពីគោលដៅ ជាកន្លែងដែលកសិករបានបោះជំរំចាប់តាំងពីពេលនោះមក។ កសិករ និងអ្នកដឹកនាំភាគច្រើន ដែលបានជួបជាមួយសារព័ត៌មាន Reuters បាននិយាយថា ពួកគេពុំមានបំណងលុបចោលការតវ៉ា ឬត្រឡប់ទៅលំនៅឋានវិញនោះទេ លុះត្រាតែការទាមទារត្រូវបានបំពេញ។ លោកវេជ្ជបណ្ឌិត Swaran Singh Kansal បាននិយាយ នៅពេលលោកទៅព្យាបាលអ្នកជំងឺថា អ្នកជំងឺរាប់រយនាក់ កំពុងត្រូវបានព្យាបាលសម្រាប់ជំងឺផ្សេងៗជារៀងរាល់ថ្ងៃ ដែលក្នុងនោះភាគច្រើនកំពុងទទួលរងពីជំងឺទាក់ទងនឹងកម្តៅ រួមមានដំណើរចង់ក្អួតចង្អោរ ការខ្សោះទឹក និងសុរិយរោគ។ លោកវេជ្ជបណ្ឌិតនិយាយថា អ្នកជំងឺភាគច្រើនត្រូវបានគេព្យាបាលនៅនឹងកន្លែង ប៉ុន្តែអ្នកឈឺធ្ងន់ជាងនេះត្រូវបានបញ្ជូនទៅកាន់មន្ទីរពេទ្យដើម្បីទទួលបានការថែទាំត្រឹមត្រូវ។ ក្រុមកសិករ កំពុងស្វែងរកការធានា ដែលត្រូវបានគាំទ្រដោយច្បាប់ ការគាំទ្រពីរដ្ឋបន្ថែមទៀត ឬទទួលបានតម្លៃទិញអប្បបរមាសម្រាប់កសិផលរបស់ពួកគេ។

ការបោះឆ្នោតជាតិរបស់ប្រទេសឥណ្ឌា បានចាប់ផ្តើមនៅថ្ងៃទី ១៩ ខែមេសា ហើយនឹងបញ្ចប់នៅថ្ងៃទី ១ ខែមិថុនា ដោយលទ្ធផល នឹងកំណត់នៅថ្ងៃទី៤ ខែមិថុនា។