រដ្ឋមន្ត្រីការបរទេសរបស់ប្រទេសកូឡុំប៊ី លោក Luis Gilberto Murillo បាននិយាយថា សហគមន៍អន្តរជាតិ គួរតែទទូចដល់អ៊ីស្រាអែល និងសម្ព័ន្ធមិត្តឲ្យប្រទេសនេះ ចរចារកដំណោះស្រាយដោយសន្តិវិធីចំពោះជម្លោះ នៅតំបន់ហ្កាហ្សា។ 

លោក Murillo បាននិយាយថា សកម្មភាពនៅក្នុងតំបន់ហ្កាហ្សា ជាកន្លែងដែលយុទ្ធនាការយោធារបស់      អ៊ីស្រាអែល បានសម្លាប់មនុស្សប្រហែល ៣៦.000 នាក់ គឺជាអំពើប្រល័យពូជសាសន៍ នេះបើយោងតាមអាជ្ញាធរក្នុងតំបន់។

អ៊ីស្រាអែល បានច្រានចោលការចោទប្រកាន់របស់អាហ្រ្វិកខាងត្បូងយ៉ាងដាច់អហង្ការ នៅចំពោះមុខតុលាការយុត្តិធម៌អន្តរជាតិ (ICJ) ដែលថាខ្លួនកំពុងប្រព្រឹត្តអំពើប្រល័យពូជសាសន៍ ដោយលើកហេតុផលថា ប្រតិបត្តិការនេះ គឺស្ថិតនៅក្នុងការការពារខ្លួន និងជាគោលដៅទៅលើក្រុមសកម្មប្រយុទ្ធហាម៉ាស ដែលបានវាយប្រហារអ៊ីស្រាអែលកាលពីថ្ងៃទី៧ ខែតុលា។

លោក Murillo បានប្រាប់សារព័ត៌មានរ៉យទ័រកាលពីចុងសប្តាហ៍ថា៖«យើងពិតជាត្រូវតែទទូច មិនត្រឹមតែចំពោះរដ្ឋាភិបាលអ៊ីស្រាអែលប៉ុណ្ណោះទេ ថែមទាំងចំពោះសម្ព័ន្ធមិត្តដ៏សំខាន់បំផុតរបស់ខ្លួន និងប្រទេសជាច្រើនទៀត នៅភាគខាងជើងនៃពិភពលោក។

លោក Murillo បាននិយាយថា៖«នៅពេលនេះ ពួកគេមានឱកាសក្នុងការបញ្ចុះបញ្ចូល (នាយករដ្ឋមន្ត្រី    អ៊ីស្រាអែលលោក បេនចាមីន ណេតាន់យ៉ាហ៊ូ ថា វាមានសារៈសំខាន់ក្នុងការឈានដល់បទឈប់បាញ់ ដែលជាគន្លឹះក្នុងការអនុញ្ញាតឲ្យផ្តល់ជំនួយមនុស្សធម៌សម្រាប់តំបន់ហ្កាហ្សា ហើយវាពិតជាសំខាន់ណាស់ក្នុងការអង្គុយចរចា ដើម្បីបញ្ចប់ជម្លោះនេះ ដោយសន្តិវិធី»។