កូរ៉េខាងត្បូង នៅថ្ងៃអង្គារ (ទី២៨ ឧសភា) នេះ បានថ្កោលទោសការប៉ុនប៉ងមិនបានសម្រេចរបស់ទីក្រុងព្យុងយ៉ាង ដែលមានគោលបំណងដាក់ផ្កាយរណបចារកម្មទី២ នៅក្នុងគន្លងតារាវិថី ដោយនិយាយថា ការបាញ់បង្ហោះបរាជ័យនេះ គឺជា «ទង្វើបង្កហេតុ» ដែលគំរាមកំហែងដល់ស្ថិរភាពក្នុងតំបន់។

គួរបញ្ជាក់ថា កាលពីល្ងាចថ្ងៃចន្ទ (ទី២៧ ខែឧសភា) កូរ៉េខាងជើង បាននិយាយថា យានចម្លង ដែលដឹកផ្កាយរណបឈ្លបយកការណ៍ «Malligyong-1-1» របស់ខ្លួន បានផ្ទុះនៅប៉ុន្មាននាទីបន្ទាប់ពីការបាញ់បង្ហោះ ដោយសង្ស័យថា ម៉ាស៊ីនមានបញ្ហា។

ទីក្រុងព្យុងយ៉ាង បានអះអាងថា ខ្លួនបានដាក់ផ្កាយរណបចារកម្ម នៅក្នុងគន្លងតារាវិថី ដែលជាអាទិភាពចម្បងនៃរបបរបស់លោក គីម ជុងអ៊ុន នៅក្នុងខែវិច្ឆិកា បន្ទាប់ពីមានការប៉ុនប៉ងបរាជ័យចំនួន ២លើក កាលពីដើមឆ្នាំ។

ទូរទស្សន៍ NHK របស់ប្រទេសជប៉ុន នៅថ្ងៃអង្គារនេះ បានបញ្ចេញវីដេអូដ៏គួរឲ្យភ្ញាក់ផ្អើល ដោយបង្ហាញពីអ្វីដែលហាក់ដូចជាមីស៊ីលកំពុងឆេះ នៅលើមេឃ នាពេលយប់ ដែលបន្ទាប់មកបានផ្ទុះទៅជាសំណុំភ្លើង ដោយនិយាយថា រូបភាពនោះត្រូវបានថតពីភាគឦសាននៃប្រទេសចិន នៅពេលកំពុងបាញ់បង្ហោះ។

ការិយាល័យសន្តិសុខជាតិរបស់កូរ៉េខាងត្បូង បាននិយាយថា ការបាញ់បង្ហោះនេះ គឺជា «ការរំលោភលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដោយមិនគិតពីលទ្ធផល និងជាទង្វើបង្កហេតុ»។

សូមបញ្ជាក់ដែរថា ប្រទេសកូរ៉េខាងជើង អះអាងថា ផ្កាយរណប «Malligyong-1» ដែលដាក់ក្នុងគន្លងតារាវិថី កាលពីខែវិច្ឆិកា ដំណើរការដោយជោគជ័យ ទោះបីជាទីភ្នាក់ងារចារកម្មរបស់ទីក្រុងសេអ៊ូល បានសង្ស័យលើការអះអាងនេះក៏ដោយ៕