ទីក្រុងសេអ៊ូលគ្រោងនឹងផ្តល់ការឧបត្ថម្ភផ្នែកហិរញ្ញវត្ថុដល់ប្រជាជនដែលស្វែងរកការវះកាត់បំពង់មេជីវិត ឬស្បូន ដោយនេះជាវិធានការចុងក្រោយបង្អស់ ដែលធ្វើឡើងក្នុងគោលបំណងជំរុញអត្រាកំណើត ខណៈដែលការចុះចំនួនប្រជាជន គំរាមកំហែងដល់ភាពរឹងមាំយូរអង្វែងនៃរដ្ឋធានីរបស់ប្រទេសកូរ៉េខាងត្បូងមួយនេះ។

ទីក្រុងសេអ៊ូលនឹងផ្តល់ជូនពលរដ្ឋម្នាក់ៗនូវទឹកប្រាក់រហូតដល់ ១លានវ៉ុន (ប្រមាណជា ៧៣៥ដុល្លារ) ដើម្បីជួយសម្រាលបន្ទុកផ្នែកហិរញ្ញវត្ថុ ពាក់ព័ន្ធនឹងនីតិវិធីវេជ្ជសាស្រ្ត សម្រាប់គូស្វាមីភរិយាដែលចង់បានកូន។ នេះបើយោងតាមសេចក្តីថ្លែងការណ៍របស់ទីក្រុងនេះ នៅថ្ងៃអង្គារ (ទី២៨ ខែឧសភា) នេះ។

ទឹកប្រាក់សរុបចំនួន ១០០លានវ៉ុន ត្រូវបានបម្រុងទុក សម្រាប់កម្មវិធីនេះ ដែលជាការអនុវត្តកម្មវិធីប្រភេទនេះជាលើកដំបូង នៅក្នុងទីក្រុងសេអ៊ូល។ ហើយនេះគឺជាផ្នែកមួយនៃកញ្ចប់ថវិកាបន្ថែម ១,៥សែនកោដិវ៉ុន ដែលអាជ្ញាធរ បានដាក់ជូនទៅសភាទីក្រុង។

ទោះបីជាកូរ៉េខាងត្បូងមានអត្រាមានកូនទាបបំផុតរបស់ពិភពលោកក៏ដោយ ពោលគឺមានកម្រិត ០,៧២ ក៏ស្ថានភាពនេះ គឺធ្ងន់ធ្ងរជាពិសេស នៅទីក្រុងសេអ៊ូល ដែលគ្រប់ក្រុមនៃស្ត្រីចំនួន ១០០នាក់ ត្រូវបានប៉ាន់ប្រមាណថា នឹងបង្កើតបានទារកត្រឹមតែ ៥៥នាក់ប៉ុណ្ណោះ ក្នុងរយៈពេលនៃជីវិតជារួមរបស់ពួកគេ ដែលជាកម្រិតទាបបំផុត ក្នុងចំណោមទីក្រុងធំៗទាំងអស់។

នៅក្នុងសេចក្តីថ្លែងការណ៍ដាច់ដោយឡែកមួយ ការិយាល័យស្ថិតិជាតិ បាននិយាយនៅថ្ងៃអង្គារនេះថា ទីក្រុងសេអ៊ូលត្រូវបានគេព្យាករថា នឹងជួបប្រទះនូវប្រជាជនធ្លាក់ចុះដល់ ៧,៩លាននាក់ នៅឆ្នាំ២០៥២ ដោយធ្លាក់ពីចំនួន ៩,៤លាននាក់ ក្នុងឆ្នាំ២០២២។

អាជ្ញាធរទីក្រុងកំពុងផ្តល់ជំនួយផ្នែកហិរញ្ញវត្ថុ សម្រាប់ការផ្សាំមេជីវិត និងការព្យាបាលភាពគ្មានកូន ដើម្បីជួយទប់ស្កាត់ការធ្លាក់ចុះនៃអត្រាកំណើត។ អភិបាលក្រុង លោក Oh Se-hoon បានប្រាប់ទូរទស្សន៍ Bloomberg កាលពីដើមឆ្នាំ២០២៤ នេះថា ទីក្រុងសេអ៊ូលនឹង «ប្រមែប្រមូលគោលនយោបាយដែលមានទាំងអស់» ដើម្បីជំរុញដល់កំណើនប្រជាជន ក្នុងនោះរួមទាំងការចាប់ផ្តើមកម្មវិធីផ្គូផ្គងគូស្រករផងដែរ៕