មន្ត្រីទេសចរណ៍នេប៉ាល់ នៅថ្ងៃអង្គារ (ទី២៨ ឧសភា) នេះ បាននិយាយថា អ្នកឡើងភ្នំជនជាតិឥណ្ឌាម្នាក់ ដែលត្រូវបានជួយសង្គ្រោះពីលើភ្នំអេវឺរ៉េស (Mount Everest ) ស្លាប់នៅមន្ទីរពេទ្យ ដែលធ្វើឲ្យចំនួនអ្នកស្លាប់ក្នុងរដូវកាលនេះ នៅលើភ្នំខ្ពស់ជាងគេបំផុតលើពិភពលោកមួយនេះ កើនឡើងដល់ ៨នាក់ហើយ។

គួរបញ្ចាក់ថា អ្នកស្លាប់ឈ្មោះ Banshi Lal វ័យ ៤៦ឆ្នាំ ត្រូវបានជួយសង្គ្រោះដោយការទាញចេញពីភ្នំ កាលពីសប្តាហ៍មុន ហើយត្រូវបានបញ្ជូនទៅមន្ទីរពេទ្យក្នុងរដ្ឋធានី Kathmandu របស់ប្រទេសនេប៉ាល់។ លោក Rakesh Gurung នៃនាយកដ្ឋានទេសចរណ៍ បានប្រាប់សារព័ត៌មាន AFP ថា៖ «គាត់ (អ្នកឡើងភ្នំ) បានបាត់បង់ជីវិតនៅមន្ទីរពេទ្យកាលពីម្សិលមិញ»។

មនុស្ស ៣នាក់ ដែលជាអ្នកឡើងភ្នំជនជាតិអង់គ្លេសម្នាក់ និងមគ្គុទ្ទេសក៍នេប៉ាល់ ២នាក់ ក្នុងចំណោម ៨នាក់ ត្រូវបានដាក់ក្នុងបញ្ជីអ្នកបាត់ខ្លួន ប៉ុន្តែត្រូវបានសន្មត់ថា ស្លាប់។

ការស្លាប់ចុងក្រោយនេះកើតឡើងនៅពេលដែលរដូវកាលឡើងភ្នំអេវឺរ៉េស ជិតដល់ទីបញ្ចប់ ដោយចំនួនអ្នកបាត់បង់ជីវិតមានកម្រិតទាប បើធៀបនឹងឆ្នាំផ្សេងទៀត។ ឆ្នាំមុន គឺជារដូវដែលមានមនុស្សស្លាប់ច្រើនជាងគេនៅលើភ្នំនេះ ដោយមានអ្នកស្លាប់ ១៨នាក់៕