រថក្រោះអ៊ីស្រាអែលជាច្រើនគ្រឿង បានទៅដល់កណ្តាលទីក្រុងរ៉ាហ្វា ជាលើកដំបូងនៅថ្ងៃអង្គារនេះ ក្នុងរយៈពេលបីសប្តាហ៍នៃប្រតិបត្តិការជើងគោកមួយ នៅក្នុងទីក្រុងហ្កាហ្សាភាគខាងត្បូង ដែលបានបង្កឲ្យ មានការថ្កោលទោសជាសកល។

សាក្សីបានប្រាប់សារព៌ត៌មានរ៉យទ័រថា រថក្រោះ ត្រូវបានគេប្រទះឃើញនៅជិតវិហារឥស្លាម Al-Awda ដែលជាទីតាំងសំខាន់នៅកណ្តាលទីក្រុងរ៉ាហ្វា ។ យោធាអ៊ីស្រាអែល បាននិយាយថា កងកម្លាំងរបស់ខ្លួនបានបន្តប្រតិបត្តិការនៅក្នុងតំបន់រ៉ាហ្វា ដោយពុំធ្វើអត្ថាធិប្បាយអំពីការរុលចូលទៅដល់កណ្តាលទីក្រុងដែលបានរាយការណ៍នោះទេ។

អ្នកស្រុក បាននិយាយថា នៅពេលយប់ កងកម្លាំងរបស់អ៊ីស្រាអែល បានវាយប្រហារតាមអាកាសលើទីក្រុងនេះ និងវាយប្រហារដោយរថក្រោះ បើទោះបីជាមានការថ្កោលទោសពីអន្តរជាតិជុំវិញការវាយប្រហារកាលពីថ្ងៃអាទិត្យ ដែលបានបង្កឲ្យមានការឆាបឆេះ នៅក្នុងជំរំតង់មួយ ដោយបានសម្លាប់ជនជាតិប៉ាឡេស្ទីនយ៉ាងតិច ៤៥នាក់ ដែលច្រើនជាងពាក់កណ្តាលនៃពួកគេ គឺកុមារ ស្ត្រី និងមនុស្សចាស់។

មន្ត្រីនៅក្នុងទឹកដីដែលគ្រប់គ្រងដោយក្រុមសកម្មប្រយុទ្ធហាម៉ាស បាននិយាយថា ចាប់តាំងពីការវាយប្រហារនោះមក មនុស្សយ៉ាងហោចណាស់ ២៦នាក់ទៀត ត្រូវបានសម្លាប់ដោយការបាញ់ប្រហាររបស់អ៊ីស្រាអែលនៅទីក្រុងរ៉ាហ្វានេះ។