​ជឺ​ជិត​ស៊ូ​៖ ជើង​ខ្លាំង​កីឡា​ជឺ​ជិត​ស៊ូ​ពិភពលោក​ចំនួន ៨​នាក់ទម្ងន់ ១១៥​ផោន (​ជាង ៥២​គីឡូ​ក្រាម​​) នឹងត្រូវ​ជួបគ្នា​លើស​ង្វៀន Who’s Number One ឬ​នរណា​លេខ​១ នា​ថ្ងៃទី​២៥-២៦ ខែកញ្ញា ឆ្នាំ​២០២១ ខាងមុខដើម្បី​ប្រជែង​ខ្សែក្រវាត់ WNO Strawweight Champion អម​នូវ​ប្រាក់រង្វាន់​ចំនួន ៣​ម៉ឺន​ដុល្លារ ក្នុងនោះ​ក៏មាន​វត្តមាន​កីឡាការិនី​ជម្រើសជាតិ​កម្ពុជា ខាន់ ចេ​សា ផង​ដែរ។​

​ព្រឹត្តិការណ៍​ដ៏​ធំ​នេះ បាន​សម្រិតសម្រាំង​សុទ្ធតែ​កីឡាការិនី​ជើង​ខ្លាំង​ចូលរួម រួមមាន​កីឡាការិនី​ចំណាត់ថ្នាក់​លេខ​១ ពិភពលោក Mayssa Bastos ដែល​កីឡាការិនី​ប្រេ​ស៊ី​ល​រូបនេះធ្លាប់បាន​យកឈ្នះ​កីឡាការិនី ខាន់ ចេ​សា ២​ដង​រួចមកហើយកាលពីដើម​ខែមេសា និង​ពាក់​កណ្ដាល​ខែឧសភា​កន្ល​ង​ទៅ រួមទាំង​កីឡាការិនី​ចំណាត់ថ្នាក់​លេខ​២ ពិភពលោកគឺ​កីឡាការិនី​ចិន Grace Gundrum។​ ​បន្ទាប់មក​គឺ​អ្នក​ប្រយុទ្ធ​កូនកាត់​បី​សាសន៍​កម្ពុជា​-​ម៉ិ​ក​ស៊ិ​ក​-​អាមេរិក ខាន់ ចេ​សា ដែល​ឈរ​ចំណាត់ថ្នាក់​លេខ​៣ ពិភពលោក។ រីឯ ៥​រូប​ទៀតសុទ្ធតែ​កីឡាការិនី​ជើង​ខ្លាំង​អាមេរិករួមមាន​កីឡាការិនី Daniele Kelly ដែល​ធ្លាប់​ប្រកួត​ចាញ់​កីឡាការិនី ខាន់ ចេ​សា ម្ដង​កាលពីដើម​ខែកុម្ភៈ​, កីឡាការិនី Amanda "Tubby" Alequin, កីឡាការិនី Alex Nguyen, កីឡាការិនី Jessica Crane និង​កីឡាការិនី Tammi Musumeci។​

​តាម​ការបញ្ជាក់​របស់​គណៈកម្មការ​រៀបចំ​កា​រ​ប្រកួត នេះ​គឺជា​ការប្រកួត​ប្រភេទ​ទម្ងន់​ស្រាល​ដ៏​ធំ​ប្រចាំឆ្នាំ ដែល​ពោល​ពេញ​ដោយ​ការចាប់អារម្មណ៍ ដ្បិត​បេក្ខភាព​ចូលរួមសុទ្ធតែជា​កីឡាការិនី​លេចធ្លោ និង​ល្បីឈ្មោះ​ជាច្រើន​ឆ្នាំ​មកហើយ ដែល​ពួកគេ​នឹងត្រូវ​ធ្វើការ​ប្រកួតប្រជែង​រយៈពេល ២​ថ្ងៃដើម្បី​ស្វែងរក​ជើង​ខ្លាំង​កីឡា​ការិនី​ជឺ​ជិត​ស៊ូ​ប្រភេទ​ទម្ងន់ ១១៥​ផោន។ ចាំ​មើល ​តើ​កីឡា​ការិនី​រូប​ណានឹង​ក្លាយ​ជា​ម្ចាស់​ខ្សែក្រវាត់ WNO Strawweight Champion អម​នូវ​ប្រាក់​រង្វាន់ ៣​ម៉ឺន​ដុល្លារ​?

​អត្ថបទ៖ លី ឈុន​ឡា